Bonos díes, bona xente.
Alborecemos col cielu escampláu ya con unes temperatures que tan alrodiu de los 3ºC, dalgo más baxes no fonderu los valles onde ta xelando, rexistrándose nel puirtu Payares 3,1ºC.
Güei vamos tener un día per prestosu con sol asgaya, sensación de fríu na solombra recompensáu pela llume del sol a la testera, sicasí al atapecer puen entrar dellos estratos pela marina na primer llinea de costa. L’aire sedrá sele ya varible con delles brises nel llitoral.
Mañana día del Nadal seguiremos con esta estabilidá anticiclónica que mos dexará’l cielu escampláu, xelaes nuecherniegues anque nun mui estenses ya intenses y temperatures afayaices al sol del mediudía. Volviendo a surdir nubes en forma d’estratos na primer llinea de costa, tantu a primeres como a últimes hores.
Martes ya miércoles van camudar poco les coses ya tendremos el cielu escampláu con dalgo de nubosidá estratificada na costa y xelaes que van dir coyendo fuercia nel interior asturianu col trascursu de los díes.
A partir del xueves mos entra nubosidá y vientos húmedos y templaos dende l’atlánticu que mos empobinarán dalguna precipitación feble y un ascensu moderáu de les temperatures, sobre too de les mínimes.
De cara a fin d’añu’l pasu d’una vaguada atlántica fadrá baxar dalgo les temperatures y mos dexará dalgo más d’agua, maquillando tímidamente les montañes de nieve pero esto yá lu diremos viendo.
Que seáis, collacies ya collacios, felices esta nueche bona y tar sollertes porque l’Anguleru dende’l mar de los Sargazos va traenos nieve abondu pa xineru ya febreru.
This work is licensed under a Creative Commons Attribution 4.0 International License.
