Bonos díes, bona xente.

Alborecemos col cielu cubiertu per nubes altes y medies ya con unes temperatures que tan alrodiu de los 12ºC, na fastera centru-oriental y de los 18ºC na ocidental, rexistrándose nel puirtu Payares 8,3ºC.

Güei vamos tener el cielu nuble por nubosidá media y alta pero sin precipitaciones, sicasí nel estremu más surocidental d’Asturies puen tener dalguna precipitación feble ya dispersa. Les temperatures van seguir condicionaes pol vientu ábrigu que soplará moderadamente en zones altes y valles averaos, quedando sele nel restu, amás dexándonos un ambiente mui seliquino.

Mañana llunes seguiremos con esta situación de vientos ábregos anticiclónicos que mos empobinarán nubosidá media-alta, dalguna precipitación feble ya dispersa na fastera surocidental y temperatures altes.

A partir del martes va dir rolando l’aire tendiendo a ser gallegu, apurriéndonos precipitaciones más xeneralizaes y un descensu de les temperatures anque tovía va ser llixeru.

El miércoles l’aire yá se va situar de componente noroeste con raches fuertes en zones altes de la cordelera, arrastrando precipitaciones en forma de xarabatos, un descensu bultable de les temperatures y nieve perriba de los 1300m, situación que va estendese hasta’l xueves.

El vienres va caltenese dalgo de nubosidá residual y yá de cara al sábadu y domingu’l cielu tará escampláu lo que favorecerá’l surdimientu de xelaes n’alborada.

Que paséis un bon domingu collacies ya collacios.

This work is licensed under a Creative Commons Attribution 4.0 International License.