Bonos díes, bona xente.
Alborecemos col cielu nuboso y precipitaciones febles con unes temperatures que tan alrodiu de los 11ºC, rexistrándose 2ºC nel puertu Payares.
Güei vamos tener el cielu mui nuboso con precipitaciones febles en xeneral que sedrán más probables na metá oriental con unes temperatures que subirán llixeramente pola ausencia total de fríu n’altor, mentantu’l fríu en capes medies malpenes varia lo que fae que tengamos prauticamente la mesma temperatura na columna d’aire a 1500m qu’a 2500m. L’aire tenderá a ser del nordés con dalguna racha molesta en zones altes ya en puntos del llitoral, baxando dalgo la sensación térmica.
Mañana xueves alboreceremos con escasa nubosidá, sicasí puen dase nublines ya borrinos no fonderu los valles. Durante la mañana’l sol calecerá dalgo l’ambiente anque l’ascensu de les temperatures másimes sedrá mui timidu, sobre too en zones espuestes al vientu nordés porque va soplar molestu ya inclusu con dalguna racha fuerte en zones de la cordelera ya puntos del llitoral.
Pela tarde pue entrar dalgo de nubosidá baxa pela fastera central asturiana.
El vienres xelará nes zones más favoretibles ya tendremos una mañana soleyera y afayaiza con aumentu de la nubosidá baxa pela tarde na metá norte d’Asturies. El sábadu alboreceremos col cielu nuboso pero con tendencia abrise claros o abancios durante la mañana pa quedar escampláu al atapecer y el domingu la xelada sedrá xeneralizada nel interior asturianu.
Siguen viendo los modelos meteorolóxicos movimientos importante na atmósfera pal llargu plazu que mos puen traer l’iviernu más crudu de sópitu pero eso yá lu diremos viendo.
Que paséis un bon miércoles collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
