El vienres tendrá llugar una charra sobro Salú Mental ya entornu llaboral, con presentación del calandariu 2.024 de Banksy Astur, ya’l sábadu habrá magüestu

Asturies Insumisa entama estes xornaes serondiegues d’alcuentru y reflexón sobro Salú Mental.

Denuncien que la irrupción de términos ingleses pa definir los maltares inherentes a problemes nel trabayu por cuenta ayena o propia trivialicen les situaciones que los creen, dando a entender que’l culpable ye quien lo carez, por tener un “síndrome”.  Términos como burnout, mobbing, síndromes de fatiga y de la persona xubilada sustituin idegues comu esplotación, abusu, acosu o presión llaboral “Fai falta recuperar conceutos como esplotación y allienación pa entender los problemes de salú mental qu’atopamos nos ambientes llaborales, necesítase un rearme en términos de llucha de clases, nos que’l trabayu coleutivu tien que dar otru significáu a lo qu’entendemos por Salú Mental”. Amás, hai que dar una atención afayaiza al xorreciente problema de les enfermedaes mentales, les más escaecies dientro d’una sanidá pública desdexada ya en procesu de desaniciu. Tou ello falaráse na charra del vienres, a les siete la tardi nel Llar La Llegra (Uviéu).

El sábadu tol mundiu ta convidáu a pasar per ellí a esfrutar d’un tradicional magüestu, con castañes y sidre’l duernu. 

Susana Sela

This work is licensed under a Creative Commons Attribution 4.0 International License.