Bonos díes, bona xente.
Alborecemos col cielu nuboso y dalguna precipitación pela fastera ocidental d’Asturies con unes temperatures que tan alrodiu de los 13ºC, rexistrándose nel puirtu Payares 5,3ºC.
Güei col pasu d’un frente atlánticu vamos tener precipitaciones durante la mañana que sedrán más abondoses na fastera surocidental y cordelera con unes temperatures másimes en descensu ya con dalgo de nieve nes cumes más altes d’Asturies. L’aire sedrá sele en xeneral con dalguna racha moderada en zones altes ya en puntos de la costa.
Mañana martes lo más destacáu sedrá per un lláu’l descensu de les temperatures mínimes durante l’alborada y per otru, una vegada qu’avance la mañana, l’aumentu del vientu ábrigu que pue dexar durantae la tarde raches mui fuertes en zones altes de la cordelera, amás de precipitaciones per esa fastera, siendo menos probables nel restu.
El miércoles tendremos un día mui asemeyáu, sicasí ascenderán bultablemente les temperatures mínimes por mor del vientu ábrigu y llixeramente les másimes.
Que paséis un bon llunes collacies ya collacios.
Semeya del Pastorín de Xove coles cumes enfariñaes de nieve.
This work is licensed under a Creative Commons Attribution 4.0 International License.
