Bonos díes, bona xente.
Alborecemos col cielu nuboso y dalgún claru o abanciu con unes temperatures que tan alrodiu de los 10ºC, rexistrándose nel puirtu Payares 4ºC.
Güei vamos tener intervalos nubosos entemecios ente dellos claros con un ascensu de les tempereatures másimes ya col aire ábrigu sele nel llanu y con dalguna racha moderada en zones altes.
Mañana llunes seguiremos con nubosidá nel cielu y amás podemos tener precipitaciones febles y disperses en xeneral con unes temperatures másimes en moderáu descensu, mentantu les mínimes suben llixeramente con una cota de nieve que rondará los 2.000m. L’aire gallegu soplará sele na fastera central asturiana y dalgo moderáu nel llitoral y zones altes.
El martes arreciará l’aire ábrigu que mos empobinará nubosidá abondosa a la cordelera y fastera más surocidental d’Asturies con precipitaciones per eses zones, llibrando como ye vezu’l restu d’Asturies. Les raches de vientu na cordelera puen alagamar los 80km/h nes zones más espuestes y les temperatures subirán moderadamente, sobre too pela costa.
El miércoles sedrá un día mui asemeyáu, sicasí les precipitaciones puen estendese a más zones y baxar dalgo les temperatures másimes. El xueves paez que va tar más seliquino ya’l vienres vuelven a descender les temperatures ya blanquear dalgo les cumes más altes d’Asturies pero esto yá lu diremos viendo.
Que paséis un bon domingu collacies ya collacios.
Semeya del nuesu collaciu El Pastorín de Xove, de les vegues de Sotres.
This work is licensed under a Creative Commons Attribution 4.0 International License.
