La Seronda ye musical n’Asturies

13 Ochobre, 2023

Ochobre vien apináu de folixes serondiegues: el Festival Seronda de Llangréu de mañana, la Feria de Seronda n’Illas el 14 y 15 d’ochobre; la fiesta de la Serondaya de Cenera (Mieres), del 27 al 29 d’ochobre y la Seronda d’Avilés los díes 27 y 28

Paez que por fin entra la seronda de veres y Asturies prepárase pa cellebralo. Esti sábadu 14 d’Ochobre, el Nuevu Teatru de La Felguera acueye’l Festival Seronda 13, un eventu que surdió va quince años de la man del Coleutivu de Baille y Música Tradicional L’Enguedeyu, col enfotu de dar puxu y esparder la cultura asturiana; esti añu, pente delles actuaciones, van dar el so reconocimientu, L’Enguedeyu de Bronce al grupu de Rock Astur Los Berrones, qu’actuará darréu.

Tamién esti fin de selmana va cellebrase n’Illas la XVI Feria de Seronda, en La Caizuela, con actuaciones de Baxel, la Bandina La Garrapiella y l’agrupación folclórica Ximielga la Saya. Too ello acompangao d’un mercáu d’artesanía y otres actividaes.

En Mieres prepárase la Fiesta de la Serondaya, entamá por L’Asociación Cultural Serondaya de Cenera (Mieres). La cita arranca’l vienres 27 a les 20h col pregón del cantante de Nuberu Chus Pedro y la entrega del Premiu de la Cultura 2023 a l’Academia de la Llingua Asturiana. A les diez de la nueche van tocar Skama la Rede (18h) ya’l sábadu tocarán el Grupu Ruxidera y les bandines Los Gascones (19h), Los Llerones (20h), el grupu Ilustres Patilludos (22h) y la banda mecigayu-ska La Tarrancha (23h). La programación músical présllase’l domingu 29 a les 13h cola actuación de la Banda Gaites de Mieres.

Pa finar, la XX Seronda d’Avilés entamá pola Federación d’Asociaciones Xuntanza d’Avilés cuntará el 27 d’0chobre coles actuaciones de la Bandina Cuatrolán,Xaréu d’Ochobre y Escontra’l Raigañu. Pal sábadu 28, a les 12h tocará la orquestina La Xarangana; darréu hai programao cantares de chigre col Orfeón de Castrillón y de tardi tocarán Rubén Alba y Nel de Purnea y José Manuel Tejedor.

Susana Sela