Bonos díes, bona xente.
Alborecemos col cielu nuboso por nubes altes y medies con unes temperatures que tan alrodiu de los 16ºC, rexistrándose nel puirtu Payares 15,3ºC onde sopla vientu de componente sur moderáu.
Güei vamos tener el cielu empuercáu de nubes medies y altes con unes temperatures n’ascensu que mos dexarán un ambiente chornosu. L’aire sedrá sele ya variable, sicasí en zones altes de montaña n’alborada puen dase raches moderaes de vientu ábrigu, amenorgando durante’l día.
Mañana xueves entovía vamos tener dalgo de nubosidá media-alta pero con tendencia a quedar poco nuboso y escampláu pela tarde. Les temperatures siguen subiendo y l’aire sedrá sele ya variable.
El vienres, sábadu y domingu tendremos escasa nubosidá y les temperatures sedrán braniegues con másimes el sábadu que puen algamar los 30ºC en dellos puntos d’Asturies, sicasí’l vienres pue soplar dalgo de nordés pela costa, faciendo que baxen dalgo les másimes y la sensación térmica.
Que paséis un bon miércoles collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
