El Salón Internacional de les Sidres de Gala va tener llugar del 28 de setiembre al 1 d’ochobre, procediéndose’l vienres 29 a la firma del Protocolu d’Adhesión a la Rede Europea de Ciudaes de la Sidra, y siendo el sábadu 30 la Xornada de Cata Abierta al Públicu, que va tener llugar nel Salón de Congresos de la Feria Internacional d’Amueses de Asturies n’horariu de 12 a 15 h. y de 17 a 20 hores.
La Casa Paquet, See de Turismu del Conceyu de Xixón, foi l’escenariu nel que tuvo llugar la presentación d’esti eventu sidreru internacional nel que participen esti añu 92 llagares de tres continentes, presentando 287 variedaes de sidre estremaes no que ye’l mayor eventu internacional de sidre d’Asturies y un de los más importantes d’Europa.
Seique’l SISGA entama’l xueves 28 coles tasties nagurales, a cargu de renomaos llagareros d’Asturies, Italia y Madeira, la cita principal pal públicu xeneral ye’l sábadu 30 nel Salón de congresos de la FIDMA, onde por namás diez euros podrá entrase a la esposición y prebase toes estes sidres, teniendo la oportunidá de mercales y de poder falar direutamente colos llagareros presentes.
Na presentación Angela Pumariaga, Vicealcaldesa de Xixón, declaró que “Pa Xixón ye un auténticu arguyu qu’esti Salón se cellebres equí una vegada más, un eventu qu’asitia a Xixón y a Asturies como referencia sidrera internacional”, aporfiando na influencia de la cultura sidrera nel calter xixonés, una de les coses que más presta a los visitantes de Xixón.
Destacó la importancia de la firma del Protocolu d’Adhesión a la Rede Europea de Ciudaes de la Sidra, con representación d’autoridaes de dellos países, un finxu hestóricu ensin precedentes que reconoz a Xixón internacionalmente como see principal d’esta rede, que va acomuñar los enfotos de toles ciudaes y rexones de tradición sidrera del continente.
De siguío tuvo llugar la intervención de Marcos A. Fernández, Presidente de la Fundación Asturies XXI, organizadora d’esti eventu, que fexo un resume de les principales actividaes que van tener llugar estos cuatro díes y que pueden consultase na páxina web de sisga.info y lasidra.as.
A lo llargo d’estes xornaes asocederán les tasties, les charres y los alcuentros sidreros, de manera que los asturianos podamos conocer toes estes variedaes de sidre pero tamién que llagareros, hosteleros ya importadores foriatos puedan conocer la sidre asturiana y la cultura que l’arrodia.
El broche d’oru pondrá’l domingu nel Restorán El Duque col Brunch de Gala nel que se van realizar una serie de maridaxes de platos gourmet con distintos tipos de sidre, a continuación del cual va tener llugar la esperada entrega de los prestixosos Premios SISGA.
Na rueda de prensa participó tamién Manuel G. Busto, Presidente del Xuráu del Salón Internacional de les Sidres de Gala, quien desplicó’l furrulamientu del concursu, con un peculiar sistema a preba de favoritismos, recalcando tamién qu’esti concursu ye l’únicu nel que s’utiliza una clasificación afecha a la nomenclatura oficial de la sidre recoyida na lexislación 2017.
Pela so parte Juan Suárez Stové, Director del Muséu de la Sidra de Asturies, que per primer vegada participa nel SISGA cola presentación en Nava de la sidre xaponés el vienres 29 y una visita al MuSi, comprometióse a amosar na visita a les sos instalaciones “Por qué tamos na punta de llanza de la cultura sidrera”.
Susana Sela
This work is licensed under a Creative Commons Attribution 4.0 International License.
