Bonos díes, bona xente.
Alborecemos col cielu nuboso y entovía dalguna precipitación pol oriente asturianu con unes temperatures que tan alrodiu de los 14ºC, rexistrándose nel puirtu Payares 9,1ºC.
Güei van dir dixebrándose les nubes pa dexanos una mañana soleyera y seliquina, dempués d’una nueche pasada por agua. De tarde vuelven a organizase de nuevu les nubes y a dexanos precipitaciones en forma de xarabatos irregularmente repartios, más probables na costa y fastera surocidental con unes temperatures en descensu y col aire que va soplar con fuercia en zones altes de la cordelera ya en puntos del llitoral.
Mañana vienres tendremos xarabatos intermitentes con mayor probabilidá na costa y pela tarde con un descensu de les temperatures que podría dexar dalguna nevada testimonial nes cumes más altes de Picos d’Europa, amás l’aire gallegu altu va soplar con fuercia nel llitoral y zones altes baxando entovía más la sensación térmica.
El sábadu van dir retirándose les nubes y yá nun tendremos precipitaciones quedando’l cielu escampláu con un descensu nes temperatures mínimes y un ascensu llixeru de les másimes, amás l’aire amenorgará pa quedar sele ya variable.
El domingu tendremos un día soleyeru ya braniegu con un ascensu bultable de les temperatures que sobrepasarán los 25ºC con vientu sele ya varible, sicasí pue haber dalguna racha moderada de componente sur en zones de la cordelera.
Que paséis un bon xueves collacies ya collacios.
Semeya de Xixón, fecha desde un globo por el pastorin de xove.
This work is licensed under a Creative Commons Attribution 4.0 International License.
