Bonos díes, bona xente.
Alborecemos con nubosidá baxa o estratificada ya con unes temperatures perriba de los 20ºC, rexistrándose nel puirtu Payares 18,8ºC.
Güei pali que pali van dir dixebrándose les nubes del alborecer pa quedar el cielu con grandes claros, amás les temperatures subirán y l’aire sedrá sele ya variable. Durante’l día puen surdir nubes de desendolque pela cordelera pero sin más importancia.
Mañana martes la situación sedrá mui asemeyada con nubes baxes al alborecer na fastera central asturiana, tando escampláu na cordelera y surocidente asturianu, tendiendo a dixebrase y abrise grandes claros con un nuevu ascensu de les temperatures y otra vegada, por mor del calor, surdirán nubes de desendolque pela cordelera durante la tarde.
El miércoles sedrá’l día más calurosu de la selmana con temperatures másimes na mayor parte d’Asturies que superarán ampliamente los 30ºC, asina y too’l cielu va tar empuercáu de nubes altes que pela tarde tenderán a desendolcase cola posibilidá de dalgún xarabatu de calter tormentosu dispersu ya ocasional.
El xueves va tar más inestable anque tovía pasaremos calor y la fin de selmana paez que tendremos un descensu bultable de les temperatures cola entrada de vientu de componente norte que vendrá acompangáu de precipitaciones pero esto yá lu diremos viendo.
Que paséis un bon llunes collacies ya collacios.
This work is licensed under a Creative Commons Attribution 4.0 International License.
