Al Sr. Barbón nun-y presta debatir, por muncho que diga lo contrario, y si nun me crees, intenta retrucar a cualisquiera de los sos tuits ensin ser un de los sos fieles seguidores y lluéu falamos

Llucía F. Marqués

Nun soi muncho de mirar les redes sociales del presidente, pa ser sincera, pero el so reciente tuit sobre la tauromaquia féxome alendar esperances sobre la posibilidá d’una llei valiente que, aún a riesgu de ser lluéu baltada pol Estáu Español, prohibiere los toros (el toréu, entiéndese) n’Asturies.

Asina que quinxe escribi-y una nota, pa una bones que tamos d’alcuerdu había que dici-ylo, y afalalu de pasu a tirar p’alantre con fechos concretos contra’l maltratu animal. Cual nun sedría la mio sospresa al ver que me tien bloqueada -a mi comu a la gran mayoría de los asturianos- col mensaxe “¿Quiénes pueden responder? Las personas que @AdrianBarbon sigue o haya mencionado pueden responder”.

La cosa tien miga, porque darréu tien otru tuit qu’entama con “Me encanta debatir con respeto” (n’español, porque como polesu y bon defensor del asturianu que ye, escribe siempres n’español) “Nunca ninguna amenaza me ha hecho cambiar de posición. Si lo ha hecho, en cambio, en un debate, escuchar argumentos razonables y razonados” diz.

Pues nun sé quien lu pudo menaciar nin muncho menos con quien puede argumentar nun alderique, porque permitir la entrada namás a “PSOE lovers” (perfil real, nun ye coña) y a quienes te den palmaines en costazu nun ye alderique, ye posturéu.

Ye una pena, porque quería comenta-y la necesidá d’actuar más allá de les semeyes y declaraciones grandones, aunque ello requiera enfrentase a los sos amos de Madrí (si, ya retrucó publicamente a la demanda xeneralizá de que faiga daqué, escudándose en que dende’l gobiernu central nun lu dexen). Quería tamién pidi-y que, polo menos, torgue la entrada de la reciella na fiesta española, cuestión que si nun ye illegal, tendría de selo (el so propiu partíu, el PSOE, impidió que se prohibiere na llei de proteición a la infancia l’asistencia de menores a los toros).

Tamién quedé coles ganes debatir con elli, siempres respetuosamente, por supuestu, la (im)procedencia de qu’un cargu públicu participe comu tal n’actos relixosos, por mui cristianu que seya a títulu personal; y ya puestos, otres cuantes cosuques. Pero na, imposible. El mio perfil, comu’l de la gran mayoría de los asturianos, ta bloqueáu, lo que diz muncho de cuanto-y gusta debatir al presidente y da una idega de cómo-y gusta gobernar.

This work is licensed under a Creative Commons Attribution 4.0 International License.