Bonos díes, bona xente.

Alborecemos col cielu cubiertu por nubes baxes que tan dexando la primera nueche tropical del branu na fastera central asturiana con unes temperatures que tan perriba de los 21ºC, mentantu na costa ocidental l’orpín consiguió resfrescar l’ambiente, tienen ente 17-18ºC, nel puirtu Payares resxistren 14,3ºC.

Güei, n’estes primeres hores, l’orpín va dir ganando terrén d’oeste a este anque nun sedrá nin mui abondosu, nin mui xeneralizáu, amás a partir de la tarde nel estremu más ocidental d’Asturies hasta llegar al cabu Peñes dirán abriéndose grandes claros ya inclusu quedar el cielu escampláu pero volviendo a nublase a últimes hores y persistiendo la nubosidá baxa na fastera oriental durante tol día. Per otru lláu les cumes más altes de la cordelera llibrarán esta situación, como ye vezu, ya tendrán el cielu poco nuboso o escampláu. Les temperatures másimes descenderán bultablemente pero la humedá alta caltendranos un ambiente dalgo chornosu, amás l’aire sedrá sele ya variable con predominiu de la componente norte.

Mañana domingu tendremos menso nubosidá y durante’l día dirán abriéndose claros, siendo más abondoses les nubes de tipu baxo na fastera central asturiana y tando’l cielu más escampláu na cordelera , surocidente y valles averaos con unes temperatures másimes n’ascensu, volviendo a algamase en munches zones los 25ºC., dalgo más conteníu l’ascensu na costa por mor de les brises marines.

El llunes tendremos un día mui asemeyáu con nubes ya claros y temperatures afayaices, sicasí na cordelera podemos tener dalgunes nubes de desendolque que puntualmente puen dexar dalguna gotera, estendiéndose esta situación al martes volviendo al branu más habitual astur.

Que paséis un bon sábadu collacies ya collacios.

Foi una pena estos díes que nun pudieremos dar el parte meteorolóxicu, porque hubo situaciones meteorolóxiques curioses que mos hubiere prestáu contalo, la tan anunciada fola de calor quedonos a les puertes, abellugaos pela cordelera les temperatures más estremes quedaron na cara sur y nos puertos de montaña, onde se batieron varios recors, mentantu na costa paso totalmente desapercibida.

Pachu Armesto Hevia mos contaba que facía muncho calor nel monte y mos apurría una semeya de La

Fontana norte desde los Foyos, nel macizu de Les Ubiñes.

Y nos vos pedimos muncho procuru y dir con agua y bien hidrataos porque un golpe de calor puen ser mui peligrosu.