La Caxa d’Aforros d’Asturies ñació’n 1946 con presupuestos públicos ya enfotos de sirviciu a la sociedá. Cuasi ochenta años dempués la llarga y llaceriosa xestión de la que foi oxetu esti ente, anicialmente públicu, convirtióla nun bancu priváu afogáu pol déficit. Nesos años Caxastur fore alquiriendo, gracies a los aforros ya inversiones de miles d’asturianos, un emportantísimu padremuñu cultural n’obres d’arte y edificios cuyu interés social y orixen públicu xustificarien, defende Andecha Astur, la so espropiación. 

La denuncia sobro la falta de control de la Obra Cultural Caxastur vien de lloñe, pero “Nesi tiempu infame’n que Gobiernu d’Asturies y Caxastur compartíen intereses económicos y políticos inconfesables, ná se quinxo facer, nin dende la Xunta Xeneral nin dende’l Palaciu de Suárez de la Riva. La complicidá de los políticos na xestión perversa de Caxastur convirtió a la Obra Cultural nuna más de les víctimes d’esta situación”, declaren dende A.A.

Anguañu nin siquier se sabe esautamente cuántes obres tan baxo’l control de los sucesores de Caxastur, seique se fala d’ente 3.000 y 5.000, de les que de la mayoría nun se sabe’l so allugamientu nin destín. 

Nesta situación, la decisión de Berta Piñán, comu Conseyera de Cultura’n fonciones, y Adrián Barbón, comu presidente’l Gobiernu’n fonciones, intenten declarar Bien d’Interés Cultural la Obra Cultural de Caxastur, ensin reclamar información nin responsabilidaes, lo que p’Andecha Astur costitúi otra amuesa de complicidá, activa y pasiva, del Gobiernu d’Asturies nesta estafa y robu artísticu de gran algame, considerando qu’escuende l’espoliu y qu’amás ye insuficiente, aporta sero -cuando los fechos delictivos tan consumaos- , nun inclui más qu’una mínima cantidá de les pieces artístiques de la Obra Cultural Caxastur, dexando’l restu albentestate, y nun garantiza’l control públicu de la mesma.

Desixen, por contra,  l’acesu de l’Alministración Pública asturiana a la propiedá d’esos bienes pa “garantizar la so permanencia y la so puesta a dimposición de los fines sociales y culturales colos que s’anició la Obra”. La solución que proponen ye la espropiación dafechu de la Obra Cultural de Caxastur, n’exerciciu de les posibilidaes llegales que permite l’artículu 39 de la Llei 1/2001, de 6 de marzu, del Padremuñu Cultural d’Asturies (BOPA n^u 75, de 30 de marzu de 2001), y otres normatives d’aplicación al casu.

Esta espropiación afeutaría tantu a los dos edificios hestóricos que, en Xixón, permanecen en propiedá de la Obra: el Palaciu Revillaxixéu y la Colexata de San Xuan Bautista comu a les obres artístiques que se determinen pertenecientes a la Obra Cultural de Caxastur, seique nun se cuenta con un inventariu fiable y munches d’elles tan desapaecíes, lo que fadría necesario una investigación previa.