Bonos díes, bona xente.
Alborecemos col cielu nuboso, tando escapláu na fastera surocidental y cordelera con unes temperatures que tan alrodiu de los 17ºC, rexistrándose nel puirtu Payares 8,9ºC.
Güei pali que pali van din dixebrándose les nubes con apertura de claros o abancios nes hores centrales del día con unes temperatures másimes n’ascensu ya col aire que sedrá sele ya variable con delles brises pela costa.
Mañana vienres esfrutaremos del sol y el tiempu braniegu, siendo lo más destacáu l’ascensu de les temperatures másimes que podrán algamar los 30ºC nel interior asturianu. A últimes hores tendremos un aumentu de la nubosidá media-baxa.
El sábadu alboreceremos ente’l borrín y la nublina ya orpinando na metá norte d’Asturies ya cola entrada de vientu de componente noroeste les temperatures descenderán moderadamente, sicasí nes hores centrales del día puen abrise dellos claros o abancios ya non tendremos precipitaciones.
El domingu refrescará tantu de día como de nueche y el cielu vamos tenelo nuboso pero con escases posibilidaes de precipitaciones ya inclusu puen abrise dellos claros o abancios en puntos de la costa y na cordelera.
Paez que la tónica de la selmana viniente sedrá la mesma qu’esta ya tendremos típicu branu Astur, sin pasar fogina ya con nubes baxes alternándose con díes más claros, tando poco nuboso o escampláu na fastera surocidental, cordelera ya dellos puntos de la costa, pero esto yá lu diremos viendo.
Que paséis un bon xueves collacies ya collacios.
This work is licensed under a Creative Commons Attribution 4.0 International License.
