Bonos díes, bona xente.
Alborecemos con grandes claros ya con unes temperatures que tan alrodiu de los 17ºC, rexistrándose nel puirtu Payares 13,3ºC.
Güei vamos tener un ascensu bultable de les temperatures másimes que puen acercase a los 30ºC a primera hora de la tarde nel interior asturianu, el cielu tará poco nuboso con dalguna nube de desendolque pela tarde na cordelera pero sin más consecuencies y l’aire sedrá sele ya variable.
Mañana sábadu la cola d’un frente va facer qu’aumente la nubosidá pela tarde per un lláu y per otru van dir surdiendo nubes de desendolque pela cordelera que puen dexar dalgún xarabatu de calter tormentosu al atapecer per esa fastera con un descensu de les temperatures másimes anque l’ambiente seguirá siendo mui afayaizu.
El domingu les nubes yá nun se desendolcarán pela cordelera, tando per ellí poco nuboso o escampláu con nubosidá estratificada na fastera central asturiana, llibrando dellos puntos del llitoral y el suroeste asturianu onde tamién va tar poco nuboso. Les temperatures camudarán poco o subirán ellí onde esfrutemos del sol.
La selmana viniente sedrá mui estable y braniega, con sol na mayor parte d’Asturies, sicasí los borrinos y nublines del alborecer sedrán frecuentes na fastera central asturiana pero dixebrándose según avance la mañana, amás esfrutaremos de temperatures mui afayaices con másimes llixeramente perriba de los 25ºC y l’aire sedrá sele ya variable.
LA MAR:
La temperatura del agua ronda los 20ºC, siendo la baxamar sobre les 14:15h y la pleamar alrodiu de les 20:30h con una altura significativa de les foles de 0,6m polo tantu la mar va tar seliquina.
Que paséis una bona fin de selmana collacies ya collacios.
Semeya de Los Oscos
This work is licensed under a Creative Commons Attribution 4.0 International License.
