El vetu de Sara Concepción Álvarez Rouco, conceyala xixonesa de Vox, a los artistes asturfalantes ye consideráu delitu d’odiu que nesti casu amás cuntaría colos agravantes d’alevosía, prevalencia de cargu públicu y reincidencia
Sara Concepción Álvarez Rouco, militante del partíu facista, conceyala Festexos y miembru la Xunta Gobiernu na Casa Conceyu de Xixón, amás de diputá na Xunta Xeneral d’Asturies participó’l pasáu 23 de xunu nel programa radiofónicu “Más d’ún”, que dirixe Guillermo Figueroa n’Onda Cero. A la entruga fecha pol presentador sobro la contratación d’artistes qu’usen l’asturianu, retrucó ensin vacilación que “si se pue, non”, dexando nidiu el so enfotu en discriminar a los artistes asturfalantes.
Esta voluntá manifiesta de discriminar a una parte la población por motivu de llingua ye ún de los casos ñidiamente tipificaos comu delitu d’odiu nel artículu 510 del Códigu Penal y na Circular de la Fiscalía Xeneral del Estáu sobro interpretación de los delitos d’odiu, siendo posible castigar esti delitu con penes de prisión d’un a cuatru años, amás de multes. De fechu, la so afirmación va contra la mesma Costitución española, l’Estatutu d’Autonomía p’Asturies, la Llei d’Usu y Normalización del Asturianu, la Declaración Universal de los Drechos Homanos, el Protocolu nu 12 del Conveniu Européu pa la Proteición de los Drechos Homanos y de les Llibertaes Fundamentales, la Carta los Drechos Fundamentales de la Xunión Europea y la Recomendación de Política Xeneral nu 15 de la Comisión Europea escontra’l Racismu y la Intolerancia.
Por tou ello, Andecha Astur vien de denunciar énte la Fiscalía Superior d’Asturies a Sara Concepción Álvarez Rouco por un presuntu delitu d’odiu por discriminación por motivu de llingua, coles agravantes d’alevosía, prevalencia de cargu públicu y reincidencia. `
L’agravante de reincidencia sofítase nel abandonu de la denunciada d’un actu na Xunta Xeneral nel Díi les Escritores al aniciar Marta Morí, vicepresidenta de l’ALLA, la so intervención n’asturianu. La diputá’l partíu facista declaró esplicitamente que coló del actu por repudiar que Marta Mori s’espresare na llingua d’Asturies.
This work is licensed under a Creative Commons Attribution 4.0 International License.
1 Comment Already