Xuan Nel Gonzali presenta un recursu nel Ayuntamientu d’Illas, contra la discriminación, illegalidá ya presunta prevaricación, del alcalde d’Izquierda Xunida ya l’arquiteutu de la OUIT de Pravia, por nega-y el drechu facer usu de l’asturianu n’alministración asturiana
Na tarde d’ayeri el ciudadanu d’Illás víctima de discriminación llingüística presentó oficialmente’l recursu en rempuesta a la desixencia de presentar n’español l’escritu nel que solicitaba al arquiteutu de la OUT de Pravia, Jose Ignacio Fernández Arias la ellaboración de la ficha téunica pa una obra que, per otru lláu y comu fae costar nel escritu presentáu comu recursu, ya tenía los permisos previamente concedios.
El recursu acusa a esti arquiteutu y a Fernando Alberto Tirador Mártinez, alcalde d’Illas d’incumplir la llegalidá vixente, apurriendo información mui detallao de les lleis y normatives qu’estos funcionarios públicos pasaron per alto -especialmente les relatives a la Llei d’Usu y Promoción del Asturianu- y remembrándo-yos que “la desconocencia de la llei nun esime del so cumplimientu”, polo que los acusa de discriminación y prevaricación.
Gonzali solicita que seya consideráu nulu l’escritu nel que se-y insta a utilizar l’español, robláu pol alcalde Tirador Martínez, al tiempu que reclama una declaración oficial esclariando públicamente’l drechu de los ciudadanos a dirixise n’asturianu a les alministraciones del conceyu y una esculpia pública por parte del arquiteutu Jose Ignacio Fernández Arias y la OUT de Pravia.
Reclama tamién que s’abra una investigación pa esclariar si esiste un delitu de prevaricación y remembra qu’esti alcalde, pal que pidi la dimisión, arrecostina ya con delles illegalidaes na so xestión nel Conceyu d’Illas. Fernando Alberto Tirador Martínez ye, amás d’alcalde, Responsable de Política Municipal d’IU, Coordinador de la Comisión pol retu demográficu n’Asturies, miembru de la Comisión Executiva de la Federación Asturiana de Conceyos, Vicepresidente de la Mancomunidá de la Comarca d’Avilés, miembru del Conseyu d’Alministración de Cogersa, miembru de Conseyu d’Alministración del Consorcio Asturianu de Servicios Teunolóxicos y miembru de plenu de la CUOTA, polo que la so mala praxis y presuntu desconocimientu de les lleis chisca a munches aries.
Xuan Nel Gonzali nun descarta aniciar aiciones llegales ante la xusticia ordinaria contra los dos funcionarios implicaos.
Susana Sela
This work is licensed under a Creative Commons Attribution 4.0 International License.
