Amás de la presencia del exércitu nel cientru pal izáu de bandera, los militares protagonizaron delles charres sobre les “salides profesionales” castrenses
Cincu docentes presentaron protesta formal ante la presencia el pasáu xueves d’una representación de les Fuercies Armaes españoles nel I.E.S Númberu 5 d’Avilés y la ceremonis del izáu de bandera, acusando al direutur de militarizar el cientru. Los profesores denuncien, amás del actu castrense, les charres informatives desendolcaes al marxe de la programación xeneral del cientru, afalando a los escolinos a allistase nel exércitu.
“Resulta llamentable” –declararon– “que l’actual director organizare una ceremonia que ta nes antipodes de les situaciones de deprendizaxe plantegaes pola llei pal nuesu sistema educativu. La prevención del suicidiu nos adolescentes, el curiáu de la salú mental, los retos que supón l’advenimientu de la intelixencia artificial, los desafíos del cambiu climáticu, el conocimientu y apreciu del padremuñu natural o la promoción de toles formes de creación y cultura deberíen concentrar los desvelos de los docentes. Xusto lo contrario de la obcecada crispación y el dañu que produxo na imaxen del nuesu cientru esi emperre de la direición por axitar banderes y utilizar l’exércitu nuna axenda polarizaora qu’a naide beneficia”.
Alberto Rodríguez
This work is licensed under a Creative Commons Attribution 4.0 International License.
