Espárdese pelligrosamente’l vezu de cellebrar l’izáu de bandera en cientros escolares, himnu d’España incluyíu. El calter militar y españolista del actu, d’obligada asistencia, ofiende a families y profesores

L’izáu militar de bandera el díe les fuercies armaes lleva años cellebrándose n’istitutos privaos de reconocíu sesgu políticu, ensin que naide denunciare l’adoctrinamientu implícitu. Agora la educación pública, teóricamente pacifista y respetuosa coles ideoloxies de los escolinos y les sos families, súmase a esti esperpentu militarista, españolista y monárquicu, con actos comu’l cellebráu esta selmana nel IES N. 5 d’Aviles, onde, con presencia militar, s’izó la bandera española al ritmo del correspondiente himnu, comu nos meyores tiempos del franquismu.

La bandera d’España ya ta presente, por imperativu llegal, en tolos cientros civiles públicos, pero con esti actu añadese-y un estra militar, de reverencia y sumisión qu’escede llargamente lo almisible. La rendición de tributu a un símbolu de la monarquía española nun casa colos drechos y llibertaes polítiques y de conciencia qu’una educación pública debe respetar. Tampocu ye de recibu la presencia de les fuercies armaes nos cientros escolares, non solo pol adoctrinamientu qu’implica sinón pol matiz menaciante inherente a la so presencia.
Dende’l sindicatu d’ensiñantes SUATEA ya ficieron declaraciones contra esti actu militarista, denunciando la participación de les fuercies armaes nos cientros educativos. 

Redaición InfoAsturies

This work is licensed under a Creative Commons Attribution 4.0 International License.