Analís del usu l’asturianu en redes polos partios que se presenten n’Asturies

9 Mayu, 2023

Aprofitando que la oficialidá ta de plena actualidá de magar la Selmana les Lletres y que son munchos los partíos que se quieren colgar la medaya llingüística anantes de les elleiciones, facemos un analís del usu real del asturianu no que va d’añu nes redes sociales de los partíos que se presenten a los comicios. Namás ún utiliza l’asturianu nel cien por cien de los casos

A les prósimes elleiciones preséntense catorce partios: Andecha Astur, Ciudadanos, Convocatoria por Asturias-IU, Foro, PACMA, PCTE, Podemos, PP, PSOE, PUEDE, SOS Asturias-España Vaciada, Suma Principado, Verdes Equo Asturias y VOX -alfabéticamente ordenaos-.

D’ellos hai diez que, direutamente, nun tienen nin un solu tuit n’asturianu. Dalgunos ye fácil saber quienes son, otros pueden sosprender: Ciudadanos, FSA- PSOE, PP, PACMA, PCTE, PUEDE, SOS Asturias-España Vaciada y Suma Principado, Verdes Equo Asturias y VOX . Destaca pente toos ellos el partíu que ganó les pasaes elleiciones vendiéndo la moto de la oficialidá y que nun foi quien a escribir n’asturianu nin siquiera el tuit nel qu’anuncien un concursu relatos pal Día de les Lletres. Nestos partíos nun se respeta siquiera la toponimia oficial, ello ye, nun respeten siquiera la llegalidá llingüística.

Foro Asturias suma un total de seyes tuits n’asturianu no que va d’añu, cincu venceyaos a la Selmana les Lletres y otru un retuit a una entrevista n’Alderiques, representando pocu más del 2%. La toponimia, n’español.

Nel casu de Convocatoria por Asturies ye más abegoso, al xunise delles sigles baxo esti paragües. Na páxina oficial de la coalición nun topamos dengún tuit propiu n’asturianu, pero sí retuiteos d’un de los sos componentes, IAS, nesta llingua. Faciendo un esfuerciu y considerando tamién por separtao los tuits de los partios que conformen la coalición, Convocatoria por Asturies raspia’l 5% de les espublizaciones, respetando d’avezu, eso si, la toponimia.

En Podemos, otru de los supuestos abanderaos de la llingua, alcontramos n’asturianu tres de ca venti tuits, con un bultable incrementu nesti caberu mes, coincidiendo coles Lletres Asturianes. Un ruinu 15% que, sicasí, los coloca en segundu llugar no que cinca a visibilidá llingüística ya que, polo menos, respeten la toponimia na gran mayoría de les sos espublizaciones.

Finalmente, los partios qu’utilicen l’asturianu neL 100% de les sos espublizaciones, tanto’n facebook comu n’instagram o twitter: ún, Andecha Astur, que resulta ser tamién l’únicu partíu que, por congruencia, ufre papeletes n’asturianu y que ta teniendo problemes coles Xuntes Elleutorales por presentar escritos n’asturianu.

Sicasí, nun exerciciu d’hipocresía elleutoral, na mani les lletres taben representantes -ya incluso pancartes- del PSOE (0%), FORO (2%), Convocatoria por Asturies (5%) y Podemos (15%). Una amuesa más del oportunismu políticu d’estes formaciones.

Nel Dos Santos