La presentación culmina unes xornaes “onde muncha xente s’atopó de nueo con muncha otra, muncha otra conocióse y onde agora ente toes van siguir, porque’l fin d’estes xornaes yera recuperar la ilusión de lo de salir a la cai, analizar que nos llevó a esti estáu de paralís y proxectar una solución que-y ponga remediu”

Esti fin de selmana, y comu previu al manifestamientu del Primeru Mayu que tendrá llugar esta mañana en Xixón, presentóse Asturies Insumisa, cola participación de toles organizaciones que conformen esti frente, dando asina acabu a unes xornaes insumises que s’allargaron tol mes d’abril, percorriendo la xeografía asturiana. Anguañu conformen Asturies Insumisa Alambique, Andecha Astur, Conceyu Popular de la Contorna Avilés, Call Centers Conecta, CNT Xixón, COESPE, Darréu, Izquierda Revolucionaria, La Clas Trabayaora, Llibres y Combatives, LCT, Mieres en Llucha, Riders, Hostelería en Llucha, Coleutivu de Carteros y La Xusticia. 

La xornada entamó con un taller de baltu nel esterior de la Casa El Chino, en Cimavilla, nel que munchos de los asistentes animáronse a prebar esta llucha ancestral asturiana.

Darréu, l’alderique final nel que participaron les persones que foron guiando les charres d’Abril Insumisu y que, con abonda participación del públicu presente, retrucaron a tres entrugues básiques: cualos son los principales problemes a los que s’enfrenta la sociedá asturiana, qué soluciones se ven pa ello y con qué erbies se cuenta pa meyorar.

Les rempuestes, con pocos matices, foron unánimes, alcordando tolos presentes que, aparte de los problemes oxetivos de precariedá, acesu a vivienda, emigración, desemplegu y demás cuestiones a les que mos lleva l’actual sistema, hai un problema importante de desenfotu, falta de relevu xeneracional, desilusión ya incluso resignación que torga a los asturianos el garrar les riendes del so futuru y lluchar por una Asturies meyor. La solución, pa toos ellos, pasa pola xunidá de l’Asturies que resiste y por una mayor y meyor organización de fuercies, pa lo qu’Asturies Insumisa quier ser ferramienta. 

Asina insistieron tolos participantes na presentación, que tuvo llugar depués d’un prestosu de taller hestóricu d’Ska, y na que quedó nidio la ilusión puesta por toles organizaciones nesta xuntura. Diego Morís, Roxu, d’Andecha Astur -una de les organizaciones participantes- espresábalo asina na so intervención: “Tamos ciertos de qu’Asturies Insumisa va ser una ferramienta social prestosa y afayaíza. Y va selo porque quier enllenar les cais d’allegría y vindicación, porque nagua por ximielgar esti país astur pa que la clas trabayaora retome la concenxa y el compromisu de defendese, porque trabaya por un nueu modelu de sociedá pa toes, porque garantiza les llibertaes, porque llucha por sirvicios públicos de calidá, porque puxa por trabayos y salarios y pensiones dignos, porque vindica la xusticia social y el repartu la riqueza, porque pon en valor la presona y la nuesa identidá comu clas y comu pueblu perriba l’arriquecimientu d’unos pocos y la esplotación de la nuesa tierra”.

Darréu los actos oficiales tuvo llugar na Sala Albeniz l’esperáu conciertu, nel que s’aporfió na importancia d’esta llucha común, incidiéndose mui especialmente nel casu de La Suiza, afalándose a toos a participar nos actos de sofitu a estes persones represaliaes por exercer los sos drechos sindicales y defender a una muyer víctima d’acosu llaboral. 

Llucía F. Marqués

This work is licensed under a Creative Commons Attribution 4.0 International License.