InfoAsturies participa nel ñacimientu de la nueva asociación, que ta en víes de llegalización y qu’aconceya -como’l so nome indica- a empreses y profesionales qu’utilicen l’asturianu comu llingua vehícular

La presencia l’asturianu nel ámbetu económicu vien espoxigando nes caberes décades y ca vuelta son más los empresarios y profesionales que se decaten de que l’usu normalizáu del asturianu ye un activu fundamental pa la sociedá asturiana y una ventayosa ferramienta pal desendolcu económicu. 

Sicasí, comu recueyen nos fines y actividaes de l’Asociación, ye perimportante qu’estes entidaes se sofiten pente si, procurando l’establecimientu de procesos activos d’interlocución cola alministración, creando sinerxes y facilitando la visibilización de les empreses y profesionales qu’usen l’asturianu na so práutica cotidiana. 

Pal cumplimientu de los fines de l’asociación tan plantegaes una amplia riestra d’actividaes, comu la organización d’alcuentros internos y actividaes públiques, la programación de simposios, alderiques, charres, meses-redondes y seminarios, la creación de conteníos dixitales, o l’asesoramientu llegal en materia llingüística, pente munches otres.

Especialmente interesante sedrá la xeneración y difusión pública d’un directoriu d’empreses y profesionales qu’utilicen
l’asturianu como idioma vehicular y de recursos que faciliten la so xera, de manera que tol mundiu tea conocimientu de qu’empreses utilicen la so llingua a la hora de guetar un serviciu.

La EPA ta en vies de formación y los sos integrantes conviden a toes aquelles empreses y profesionales qu’apuesten pol usu del asturianu nel so díi ente díi a formar parte d’esta asociación. Fasta agora son 83 los participantes, que vos diremos dando a conocer nes prósimes selmanes.

Susana Sela

This work is licensed under a Creative Commons Attribution 4.0 International License.