Si Foro Asturies (esi Asturies tendría de llevar munches comines) aporta a l’alcaldía de Xixón, menacien con facer retroceder a Xixón nel tiempu y devolver al conceyu esa seña de coloninalismu xabaz y sanguín que son les feries de tauromaquia

Agostu de 2021, el conceyu Xixón cellebraba l’anuncia del fin de la Feria de Begoña, recoyéndose asina’l sentir ciudadanu, que llevaba más d’un sieglu demandando la fin d’esta tradición tan española; la Plaza d’El Bibio xeneró una fuerte oposición dende la so mesma costrucción, col argumentu d’atrayer turistes, nel añu 1888.

Sicasí, esta decisión naciere coxa, ya que cola tibieza que carauteriza la “izquierda” española, la feria suspendióse garrándose a un tecnicismu llegal y non comu una prohibición clara de la tortura, dexando asina la puerte abierta a recuperar los toros más alantre, comu se propón facer Foro Asturies, casu d’aportar a l’alcaldía.

“Ya tamos trabayando nello” diz Carmen Moriyón ensin depeñase, comu si fore ya alcaldesa, comu si lo qu’opinen los asturianos sobro la tortura fore agua que cai y comu si nun esistieren lleis y normatives sobro’l maltratu animal, que per otru lláu discriminen fuertemente a los bóvidos frente a otros animales.

Dientro’l tópicu de la esquizofrenia política asturiana esti partíu dizse asturianu ya incluso n’ocasiones asturianista, mientres lleva per bandera la recuperación d’una de les tradiciones más rancies, vergoñantes y sanguines de los españoles.

Nel Dos Santos