Los nomes de los toros mataos, “feminista” y “nigeriano” valieron d’esculpia pa que’l plenu municipal acatare’l deseyu de la mayor parte de la población xixonesa, anulando les corríes de toros d’equí n’alantre

El conceyu ta de norabona; la so alcaldesa, Ana González, vien d’anunciar que la d’esti añu foi la cabera Feria de Begoña. Nun tornará a anovase nin sacase a concursu’l permisu pa la xestión de la plaza como espaciu pa corríes de toros. Con ello recuéyese’l sentir ciudadanu que llevaba más d’un sieglu  demandando la fin d’esta tradición tan española. De fechu, la Plaza d’El Bibio xeneró oposición dende la so mesma costrucción nel añu 1888, col argumentu d’atrayer turistes.

Ana González declaró que, al traviés de los nomes puestos a los animales, “utilizáronse los toros pa desplegar una ideoloxía contraria a los drechos humanos”. Son abondes les voces que declaren que’l problema nun ta nesos nomes y que bien se sabe dende hai tiempu cual ye la ideoloxía -española, racista, machista, reacionaria- que s’escuende tres d’esa práutica. Sicasí, hai consensu sobre que lo qu’emporta agora ye la fin de les corríes, perriba de la causa que lo motive.

La relevancia d’esta decisión nun afeuta namás a Xixón, ya que col preslle de la Plaza d’El Bibio a la tauromaquia esta cruenta cellebración  desapaecerá dafechu de les places asturianes, siendo comu yera esta la única plaza toros que caltenía actividá, depués de décades d’abandonu del cosu d’Uviéu.

Nuria Prendes

This work is licensed under a Creative Commons Attribution 4.0 International License.