Andecha Astur aconceya nun alderique a representantes de los seutores afeutaos pola decisión de llantar torres eóliques na mar asturiana
El prósimu vienres 31 de marzu, a les 19:00 hores na sede’l Conceyu la Mocedá, en Xixón, tendrá llugar un alderique nel que se podrán sentir estremaos puntos de vista sobro la utilidá y les consecuencies de la istalación de fasta cien eólicos marinos, a 21 km de la costa asturiana.
Tres de l’anuncia de la futura istalación de molinos eólicos na mar d’Asturies son decenes les entrugues que surden, tanto alrodiu les sos consecuencies -ecolóxiques y económiques- comu sobre quien tien de decidir sobre esti tema “¿Son necesarios los molinos eólicos na mar d’Asturies? ¿Decidiólo Bruseles, Madrid o Asturies? ¿Cuántos molinos eólicos quieren poner n’Asturies? ¿Cómu se llanta un molín eólicu na mar? ¿Túvose’n cuenta la opinión de los pescaores y de los defensores del mediuambiente? ¿Fízose más casu a los científicos o a los oligopolios de la enerxía? ¿Un parque eólicu dura tola vida? ¿Muévense munchos millones d’euros nesta industria? ¿Tien dalguna consecuencia ñegativa la enerxía de los vientos? ¿La eólica ye una enerxía llimpia o hai trames de corrución? ¿Ye normal un parque eólicu nuna zona marina protexía pola so importancia pa la biodiversidá? ¿Cuánto sabía Barbón de los parques eólicos marinos n’Asturies enantes de que salieren nel BOE? ¿Cuánto ganen les empreses eóliques? ¿Cuántos fondos públicos reciben estes corporaciones? ¿Cuántu hai de trayeutoria democrática y cuándu de guión empresarial nel camín haza la enerxía eólica? ¿Qué ye una moratoria eólica? ¿Ye bono p’Asturies aprebar una moratoria eólica?” Estes son dalgunes de les entrugues que planteguen dende Andecha Astur y a les que va intentar dase rempuesta, dando voz a los afeutaos por esta decisión.
Asina, el seutor pesqueru -un de los más perxudicaos en casu de llevase a términu esti plan- tendrá una representación istitucional y otra de los pescaores, esperándose la presencia d’un representante de la Direción Xeneral de Pesca d’Asturies y de María José Rico Fernández, Secretaria Xeneral de la Federación de Cofradíes de Pescadores d’Asturies. Per otru lláu, falando de les posibles consecuencies sobre la biodiversidá d’estos sistemes de produción d’enerxía, participarán Fructuoso Póntigo, de la Coordinadora Ecoloxista d’Asturies, y Eneko Aierbe, miembru d’Ecoloxistes n’Aición.
Finalmente, Mariano Suarez intervendrá a nome d’Andecha Astur, organización que ya anantes de la presentación d’esti caberu proyeutu venía reclamando l’aprebación d’una na moratoria eólica y fotovoltaica, que protexa el paisaxe y la biodiversidá asturianos polo menos fasta la ellaboración n’Asturies d’un imprescindible Plan Estratéxicu de Recursos Enerxéticos, un Plan de Planificación del Territoriu y un Plan d’Ordenación d’Espacios Marítimos.
Redaición InfoAsturies
This work is licensed under a Creative Commons Attribution 4.0 International License.
