Los nacionaliegos consideren que la política del Gobiernu de Barbón en materia d’enerxía nun tien xacíu, consistiendo cimeramente nuna sucesión de planes d’istalación de parques eólicos, ensin planificación ya ensin valoración abonda de los daños medioambientales y sociales que causen, de lo que albidren un entramáu d’intereses sospechosos pente les grandes corporaciones del seutor y dalgunes estayes del gobiernu actual
El Gobiernu español (PSOE/Podemos/IU) dio ayeri de pasu’l Plan d’Ordenación Marítima de la Fastera Norocidental, qu’inclúi tola costa asturiana. Dicen que l’oxetivu ye “protexer los ecosistemes y l’hábitat marítimu”. En rialidá acaben ceder a les presiones de les multinacionales, autorizando grandes superficies de molínos eólicos de más de doscientos metros d’altor na nuesa mar. Y eso que son progres y ecoloxistes.
Nel otru estremu, Andecha Astur vien de proponer una moratoria eólica y fotovoltaica, que protexa el paisaxe y la biodiversidá asturianos polo menos fasta la ellaboración n’Asturies d’un imprescindible Plan Estratéxicu de Recursos Enerxéticos, un Plan de Planificación del Territoriu y un Plan d’Ordenación d’Espacios Marítimos.
N’espera d’esos planes, reclamen una Llei de Moratoria de la Enerxía Eólica, Eólica Marina y Fotovoltaica.
Estes enerxíes carauterícense por necesitar invadir notablemente’l territoriu, ocupando grandes superficies y presentando graves consecuencies de degradacion ambiental y social del territoriu ocupáu, camudando dafechu’l paisax tradicional y la organización y forma de vida de los habitantes.
Pa torgar esto, n’Andecha Astur tienen nidio la necesidá d’una normativa d’esplotación enerxética que regule y planifique la produción d’enerxía n’Asturies, de manera que cualquier enerxía a la que se recurra seya compatible cola proteición del mediu ambiente, incluyendo’l caltenimientu del paisax tradicional, biesques y montes, asina comu compatible coles actividaes del seutor primariu (agricultura, ganadería, pesca), quedando poro escluyíes les istalaciones n’espacios ñaturales con proteición paisaxística, daqué que de man paez que cae de caxón pero que frenaría el caberu plan pa la istalación d’esplotaciones eóliques en Somiéu, recién aprebau. Tampocu caben istalaciones d’esta triba n’espacios protexíos por interés padremuñal o arqueolóxicu.
Redaición InfoAsturies
This work is licensed under a Creative Commons Attribution 4.0 International License.
3 Comments Already