Vecinos d’Illas reclamen a la Ca’l Conceyu la recuperación del puntu llimpiu

24 Marzu, 2023

El serviciu, operativu nel añu 2.022, dexó de furrular a entamos del presente añu, ensin que siquier s’actualizase la información de la páxina web

De magar l’entamu del 2023, ya ensin que mediare desplicación dala, los moraores d’Illas nun cuenten col serviciu de puntu llimpiu, que sicasí furrulaba – malque con perpoca ufierta- nel añu 2022. La Ca Conceyu nun retruca siquiera a los escritos presentaos pidiendo información al respeutu por un vecín, el primeru el pasáu 16 de xineru -cuando se costató la desapaición del serviciu- y, nuevamente, el 15 de marzu.

La perda d’esti serviciu ta teniendo ya les sos primeres consecuencies n’apaición de vertederos ya escombreres illegales n’estremaos puntos del conceyu.

Amás, la páxina web del Conceyu lleva ensin actualizase dende l’añu pasáu, apurriendo información sobre horarios y feches de recoyía que nun son ciertos nes condiciones actuales. Ello nun afeuta namás a la cuestión del puntu llimpiu, sinón que la desactualización de la páxina web ye xeneral, teniendo de ser los propios vecinos los que yos llamen l’atención pa desixir que se suba a la mesma información de recién ya d’interés pa tola xente del conceyu.

Redaición InfoAsturies