Nel marcu la charra “Alvaro Flórez Estrada, economista, patriota, revolucionariu y profesor n’Oxford”, entamá por Ástura ya l’Atenéu Obreru de Xixón, el conferenciante, el profesor David M. Rivas, ufrió un interesante repasu de la biografía, la persona y la obra del qu’elli considera’l meyor de los munchos teóricos economistes asturianos de la dómina. Una sala apiná de xente siguió con gran enfotu la remembranza d’esti illustre asturianu
SENTIR PODCAST DE LA CHARRA.
Talo comu desplicó Rivas na so intervención, al final del sieglu XIX la reforma agraria ya’l xorrecimientu rentes pente l’altu campesináu dio llugar n’Asturies a una importante xeneración d’economistes, propiciada tamién pola fuerte lligazón secular de los asturianos con Francia, Irlanda ya Inglaterra, que llevó a munchos fíos de fidalgos asturianos arriquecíos a estudiar en Llondres y vivir en primer persona la ñacencia d’una nueva ciencia que parecía desplicar la realida y los conflictos d’otra manera.
Pente toos aquellos economistes, el más reconocíu ye, ensin dubia,Xovellanos ya’l que menos, probatiblemente –esceuto na Universidá d’Oxford, onde estudió y onde tien un aula nel so honor-, ye Álvaro Flórez Estrada. Sobre elli, aporfia David Rivas, echóse una cortina silenciu, por ser Flórez el teóricu asturianu de la economía más incómodu: lliberal, radical, protorepublicanu, socializante, tradicionalista, anticlerical, demócrata, francmasón y presidente d’una Asturies soberana.
Condergáu a muerte’n tres ocasiones pol rei d’España, esti somedanu conoció personalmente a los pas de la teoría económica moderna (Adam Smith, David Ricardo, James y John Mille), foi por un curtiu periodu Tesoreru xeneral del reinu con Godoy-cargu del que dimitiría por nun cuadrar colos sos principios-, anantes de ser procurador de la Xunta Xeneral y depués presidente de la Xunta Suprema d’Asturies nel 1808.
Ta presente nes Cortes de Cádiz, pero llamentablemente nun participa na so redaición, a la que Rivas considera que pudiere apurrir un cariz muncho más lliberal ya igualitariu, reclamando, pente otres coses, el sufraxu universal (masculín).
Remembró tamién que fore ministru tres l’alzamientu del xeneral del Riego, anantes de tornar ser condergáu a muerte pol rei d’España; el so segundu esiliu fae d’elli un republicanu convencíu y un anticolonialista radical. Nos llibros qu’escribe nesa época defende la tierra comunal pero que pueda usase individualmente por families campesines pagando una renta, daqué que munchos vieron comu un avance hacia posiciones socialistes, pero que plantega, matizó David, dalgo que cualisquier asturianu anterior a la Guerra Civil reconocería, el Foru y mampostería, instituciones y normes constitudinaries que se conservaron n’Asturies hasta los años cincuenta del sieglu XX.
Siendo senador vitaliciu retírase a Somiéu y muerre’n Noreña, onde acabó enterráu nuna fuesa común el que fore ún de los meyores economistes lliberales y primer presidente d’Asturies, entendía como una nación moderna.
La conferencia del profesor Rivas Infante foi un claru llamáu a la sociedá asturiana pa que se reconoza comu se debe la importancia d’Álvaro Flórez Estrada.
Llucía F. Marqués
This work is licensed under a Creative Commons Attribution 4.0 International License.
