El xuiciu que ta desendolcándose na Audiencia nacional española nun sedría posible ensin la denuncia d’Andecha Astur nel añu 2.009; entos, como agora, los medios de comunicación tapecieron el llabor contra’l fraude de la formación nacionaliega
El macroxuiciu poles obres d’ampliación del puertu El Musel lleva a l’Audiencia Nacional Española el mayor casu de corrución protagonizáu pol PSOE n’Asturies: 250 millones € de sobrocostu falsiáu, 21 acusaos de fraude, prevaricación y otros delitos. Sicasí, esto ocurre 18 años depués de qu’entamaren a dase los fechos xulgaos, doce dende qu’Andecha Astur denunciare esos mesmos fechos ante la OLAF -Oficina Europea de Llucha Escontra’l Fraude-.
El tiempu pasáu dende entós fae que dende Andecha consideren necesario facer públicu un informe nel que se remembren unos fechos que n’aquel entós taben en boca de toos, seique toles autoridaes competentes miraren pa otru lláu. Na so páxina web pue alcontrase un pequeñu informe que resume tola información refería al conocíu comu “Casu El Muselón”, entamando pol datu de la denuncia por parte d’A.A d’esti grave casu de fraude y corrución, en 2009, de la man de la so coallición Europa de los Pueblos.
L’informe recueye tamién sucintamente lo que taba pasando n’El Musel: “cómu se tiraba fierro a la mar, cómu camiones qu’entraben con mercancía salíen de vuelta figurando comu entregao, cómu nun había causes pa un sobrocostu tan brutal comu 250 millones €…, too ello yera vox populi. Sicasí, los partíos políticos y les estayes sociales organizaes comu casta, prefirieron ser cómplices silenciosos de lo que taben faciendo Areces y el PSOE. Sólo Andecha Astur tuvo’l compromisu y el valor de denunciar los fechos énte la OLAF”.
Cincu años dempués d’esta denuncia, en 2014, la OLAF daba la razón a Andecha Astur y espublizaba’l so informe final, reconociendo nes sos páxines que se trata d’una obra inecesaria y onde les autoridaes y les empreses amagostaron un falsu sobrocostu de 250 millones € pa repartíselos. Hebio falta esperar otros 9 años pa que les autoridaes españoles entamaren a tomar cartes nel asuntu, cuando ya les perres y la credibilidá d’Asturies ante les organizaciones europees tan irremediablemente perdíes.
P’Andecha Astur dos son los factores que ficieron posible un desfalcu d’estes magnitues, la megalomanía d’Areces per un lláu ya’l réxime mafiosu de la FSA-PSOE, que necesitaba d’esa inyeción económica pa “poder siguir engrasando les costoses redes clientelares coles qu’amarra’l llibre foncionamientu la sociedá”.
Redaición InfoAsturies
This work is licensed under a Creative Commons Attribution 4.0 International License.
