Protesta pola mala xestión del personal del HUCA

  • 17 Xineru, 2023

Pesi al temporal, más de doscientes persones aconceyaron esta mañana a les puertes del HUCA nuna concentración al marxen de los sindicatos na que denunciaron la mala xestión de los recursos humanos nel Hospital Universitariu Cientral, entregando a la xerencia del Aria IV un manifiestu robláu por más de mil profesionales

Los trabayaores del Aría IV entregaron güei un manifiestu nel que treslladen el so descontentu pola xestión que de la mesma se ta faciendo.  Robláu por más de un millar de profesionales d’estremaes categoríes, principalmente enfermeres, ausiliares y celadores, l’escritu denuncia que lleven un tiempu careciendo’l retayu de los sos drechos llaborales, con cuestiones qu’afeuten incluso a la cancelación o aprobación de descansos con namás 24 hores d’antelación y denegación de díes llibres por asuntos propios.

La mala comunicación y la disparidá de criterios ente los mesmos mandos, asina comu la nula información a los trabayaores sobre los cambios, xenera una situación d’incertidume inasumible, especialmente pente’l personal con contratos interinos, qu’entá nun tienen en dellos casos siquiera cartelera añal nin ubicación.

Aparte, la organización de los turnos rotatorios xenera tamién refuga, al programar descansos arbitrariamente, n’ocasiones con merma económica al designalos en nueches y díes festivos.

Les enfermeres y celadores alvierten que too esto pue derivar nun incrementu de les baxes sicolóxiques y un xorrecimientu del absentismu que vendría a agravar l’actual falta de personal sanitariu nos hospitales asturianos, perxudicando asina mesmo la calidá de l’atención a los pacientes. El manifiestu fina con siete desixencies que los trabayaores quieren negociar cola xerencia del Hospital, incluyendo el cumplimientu de la llei en materia de descansu, el respetu de la conciliación llaboral y la meyora de les comunicaciones, pente otro.

Estes y otres cuestiones -comu la fienda salarial en comparanza con otros países- son el motivu de que falte personal sanitariu dimpuestu a trabayar na sanidá pública asturiana, un serviciu xestionáu en términos xenerales con tantu desenfotu comu falta de recursos, nun camín que munchos ven empobináu al favorecimientu de la sanidá privá. En pallabres de Javier Santamaría, enfermeru del HUCA “Esta ye l’Asturies que tamos heriedando por parte’l gobiernu que tenemos”.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies