• Portada
  • >
  • Opinión
  • >
  • El xorrecimientu de precios en productos básicos supera’l 18% de media

El xorrecimientu de precios en productos básicos supera’l 18% de media

  • 15 Avientu, 2022

Más del 18% de xubía media pente tolos productos de primer necesidá, comu llechi, pan, carne o verdures

Si sales a mercar y tornes cola metá de lo que cuntabes, si el fin de mes aporta a mediaos o si tas plantegándote seriamente cenar güevos con patates en Nuechibona, sabes de lo que toi falando. Les perres nun dan.

Coime, diran, normal, la inflación interañal a mes de payares yera del 6’8%, la acumulá de tol añu del 5’5%, hai qu’aprietar el cinchu. Pero ye qu’a tí -y a mi, y a munchos- facer la compra faesenos más d’un 5’5% abegoso. Pues normal tamién. Porque nel cálculu la inflación entren conceutos comu hoteles, restaurantes, muebles, arruelu o cultura, cuestiones nes que llamentablemente munchos tenemos el gastu pospuestu indefinidamente y nes que los precios subieron, pero menos.

Les coses pescánciense meyor si miramos a la compra básica d’alimentos y comprebamos (oh, sospresa!) que la xubía ehí ta pente los 9’8 que xubió la carne d’oveya y los 42’8 % que xubió’l preciu’l zucre.

Xunto col zucre, los precios que se dispararon perriba’l 20% son los de les fariñes (y poro la pasta, alimentu básicu de les families con menos presupuestu), les hortalices, la llechi, los güevos y la manteguina. Les proteines tuvieron un espoxigue más discretu, pente’l cuasi diez por cientu y más del 13%, siendo la carne de vacuno la que más encareció.

Asina que nun tamos falando d’una inflación real del 6’8, ya de si llaceriosa, sinón que pa les economíes más vulnerables, aquelles que tienen de priorizar el gastu de sosistencia, falamos de más d’un 18% de xubía nos gastos diarios. Esto ya nun ye aprietar el cinchu, ye tronzar la economía pela metá a pura fuercia.

Pa echase a tremar.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies