Entrevista a la candidatura de CSI Educación

  • 28 Payares, 2022

El 1 d’avientu sedrá xorná d’elleiciones sindicales na Escuela Pública Asturiana. Con talu motivu, entrevistamos a les compañeres de la candidatura de CSI-Educación

¿Qué analís facéis de la situación que tien aguañu’l profesoráu?
Nos caberos años les condiciones de trabayu del profesoráu empeoraron bultablemente, d’ehí que’l llema la nuesa campaña seya, precisamente, escontra la esplotación. Les xeres burocrátiques multiplíquense fasta l’esperpentu y tórguenmos dedicar el tiempu a lo bramente importante: centramos nel escolináu y la so formación, dar clas. Agora mesmo, ye norma que’l profesoráu dedique munches hores de lo que debiere ser tiempu llibre a trabayar. Y nun hai d’escaecer que, les más de les vegaes, aportando los medios informáticos, la conesión a Internet, etc.
Les vindicaciones llaborales coles que s’algamaría una meyor atención al escolináu, son sistemáticamente inoraes pola Conseyería. Nun se contrata más profesoráu, nun mengüen les ratios d’escolináu, nun hai desdobles, nun se presta una braera atención a la diversidá, etc.
A ello hai qu’amestar que somos el territoriu que pior paga a los docentes. Mentantu’l gobiernu’l PSOE defiende un discursu de defensa de los sirvicios públicos, caltién unes condiciones de trabayu y remuneraciones ñidiamente piores que les del restu l’estáu.
Too ello endolcao con una evaluación docente discriminatoria, con un profesoráu de primera y de segunda, arbitraria y cuyu únicu oxetiyu ye que’l “Principado” aforre dineru a costa les trabajaores de la enseñancia.
¿Cuáles son las llínies básiques de la vuesa vindicación y de la vuesa aición?
Les nueses llínies básiques na vindicación son precisamente éses: menguar les ratios, aplicar desdobles, ameyorar la dotación de recursos d’atención a la diversidá y ampliar plantilles en tola enseñancia: Infantil, Primaria, Secundaria y Formación Profesional.
Paralelamente desiximos la equiparación salarial ente los estremaos cuerpos docentes y l’amenorgamientu la carga lletiva n’Infantil y Primaria, asina comu pa los mayores de 55 años. Igualmente, vindicamos una disminuión de les xeres burocrátiques pa centramos en dar clas, defendemos l’enseñu públicu, el feminismu y la llingua asturiana.

¿Qué camentáis de la nuea llei educativa (LOMLOE) y de cómu la tán llantando?
La LOMLOE ye una custión abegosa. Ye una nuea llei educativa que frañe colos paradigmes previos y que, poro, xenera abondes duldes y entraña una serie de riesgos.
Nun foi consensuá y discutía col conxuntu la comunidá educativa, sinón que se llantó ensin diálogu, daqué que siempre ye ñegativo y colo que nun podemos tar d’alcuerdu. Sicasí, valorámosla positivamente nel aspeutu de que frañe cola LOMCE, que foi una de les mayores torgues que sofrimos.
El principal problema ye l’afoguín que tienen por llantala, que prevocó que’l profesoráu tenga de trabayar con ella ensin que pudiere estudiala, formase y preparase pa esti nueu modelu. Espublizáronse los currículos dos díes enantes d’aniciar el cursu, entamen les clases ensin programaciones, que se mos desixe qu’entreguemos ensin formación dala y en plazos percurtios. Y ta dándose una formación mui floxa y con un cursu yá entamáu. Un braeru despropósitu.
¿Cómu veis y cómu vos plantegáis la custión de la llingua asturiana na escuela pública?
La nuesa posición na tema la llingua ye ñidia: l’asturianu tien de ser oficial. De fechu, fuimos l’únicu sindicatu del Enseñu que se manifestó a esti respeutu demientres la posible reforma l’Estatutu d’Autonomía’n 2021. Acullá d’eso, desiximos que la Llingua Asturiana nun seya una materia de segunda nos colexos y, sobro too, nos Istitutos, onde munches vegaes avérase y marxínase arrémente. Apostamos pola creación de la especialidá y vindicamos la convocatoria d’oposiciones y l’actualización de la bolsa.
Asumimos esta problemática comu propia y vamos trabayar por ella, estremándomos de quienes asumen estes vindicaciones sol papel, pero llueu nun faen res por llevales a la práutica.
Al marxe la campaña elleutoral, ¿qué llínies de trabayu tenéis abiertes?
Comu te dicía, les vindicaciones específiques del profesoráu de Llingua Asturiana costitúin una de les nueses llínies fundamentales de trabayu. Asina mesmu, dende l’acabu’l caberu cursu, tenemos una campaña, con diferentes materiales, pa informar y sofitar al profesoráu énte posibles problemes rellacionaos col PIN parental. Nun ye un problema grave, pero yá topamos dellos casos y pescanciamos qu’hai de formar ya informar pa poder prevenir. Igualmente, tamos esmolecíos pola falta presonal y de
compromisu de la Conseyería cola atención a la diversidá.
Nes caberes selmanes falóse de negociar un nueu alcuerdu d’interinos y anguañu tamos trabayando en cómu facer pa qu’esa negociación salga de les bases y nun se negocie en meses onde nin los interinos nun van tar representaos.
Pa finar, si hai dalgo que tenemos ñidio y que mos esmolez, ye la necesidá d’escuchar al profesoráu, non d’echar el mítin, y d’acudir a centros que, sistemáticamente, tán escaecíos pol conxuntu los sindicatos. Too ello col oxetivu de que tien de ser el profesoráu, en xuntanza, el que participe de la solución a los sos problemes. La Xunta Presonal y/o la Mesa Seutorial tán mui bien, pero eso nun ye lo fundamental. Lo
importante de dotamos y alitar la participación.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies