Con motivu’l so quince aniversariu Nora Antifa entama una riestra d’actividaes pa los tres caberos sábados del mes
Nora Antifa ye un conceyu autónomu de la Coordinadora Antifacista d’Asturies, que fae la so llabor ente los conceyos de Noreña, Siero, Llanera y Sariegu, ello ye, la Comarca’l Nora o Cuenca’l Nora, acomuñando a la xente d’esos conceyos que comparte másimes comu’l antifacismu, anticapitalismu y antiracismu. La so presencia n’estremaes ámbetos, estayes y plataformes de calter antifacista faen d’ellos un referente na llucha contra’l sistema d’angüañu.
Aprofitando que’l cabudañu de la so creación coincide nel mes más cañeru del calendariu asturianu, nesti el so 15 aniversariu entamen actividaes demientres tres sábados, entamando’l 15 d’ochobre a les 18 hores cola proyeición de “Los labios Apretaos” y alderique col so autor, Sergio Montero, nel Llocal de la Asociación Mistos, en La Pola Sieru.
El sábadu 22 nel mesmu llocal, allugáu na Plaza Olof Palmer, Michel Suárez presentará la charra y alderique “Democracia como Totalitarismu”.
El sábadu 29 cellebraráse un homenaxe a les víctimes de Carbayín, a les 12 hores, nel mesmu Campusantu onde tan enterraos.
Y como pa cola llucha siempres tien qu’haber folixa, tendrá llugar el Conciertu IX Asturies Arde, cola participación de Skama la rede, RPG 7, Parva Cuchu y Sangre d’Ochobre, na Sala Gong d’Uviéu de magar les 22 hores.
Xicu Llamazares
This work is licensed under a Creative Commons Attribution 4.0 International License.
