“Esisten munchos medios técnicos p’amenorgar l’impactu de les combustiones térmiques. Desconocemos con cuálos va cuntar esta planta, pero ye precisu que, tal que se fai n’otres térmiques similares, se-y dote d’un duple filtru p’amenorgar la contaminación espulsada pela chimenea.”

Dende la Coordinadora Ecoloxista d´Asturies vienen de rexistrar un pidimientu formal al Conceyu de Tinéu pa que se paralicen los trámites de la llicencia municipal que daría lluz verdi a l’ampliación de les istalaciones de la planta de tratamientu térmicu de la Curiscada

La empresa constructora Tinastur, S.C.L solicitó al Conceyu la llicencia municipal pa la istalación de la planta d’ensugáu y tratamientu térmicu de la maera con fonte de calor anovable. D’alcuerdu al Reglamentu d’Actividaes Cafiantes, Insalubres, Nocives y Peligroses, los ecoloxistes presentaron delles solicitúes, allegamientos y pidimientos d’información. Sicasí, el Conceyu nun sometió la información del espediente pa la so consulta pública na  See Lletrónica nin facilitó l’acesu al mesmu.

Consideren imprescindible qu’anantes de dar el permisu se faiga una evaluación ambiental, que tenga en cuenta’l riesgu y la dispersión de contaminantes xeneraos pola quema de biomasa. La evaluación, reclamen, tien de sopesar l’allugamientu de la istalación solicitada por Tinastur, S.C.L y considerar la contaminación xenerada por otres actividaes del polígonu industrial de la Curiscada, como la quema de borrafes, ente otres.

L’actual planta de tratamientu térmicu atropa numberoses denuncies per parte de los vecinos del Cruceru. Les instalaciones de la Curiscada atópase a una distancia insegura de dellos núcleos de viviendes prósimes, dientro d’un radiu de 500 metros, polo que ye bien importante conocer l’impautu de les emisiones al aire y evitar un casu grave de salú pública.

This work is licensed under a Creative Commons Attribution 4.0 International License.