Hai falta activar darréu’l protocolu de contaminación del aire na área de Xixón, al llevar dellos díes con concentraciones peraltes de partícules
El protocolu anticontaminación vixente del Conceyu conclúi p’aplicalo “que se va activar el nivel preventivu si mientres 3 díes siguíos supérense los 41 µg/m3 Pm10 o 21 µg/m3 Pm 2,5 pa situaciones meteorolóxiques qu’enzanquen la dispersión de contaminantes na atmósfera nuna estación” d’alcuerdu a la norma publicada nel Bopa del pasáu 24 de payares del 2021.
Non solo se superaron los 41, sinón que s’algamaron los 515 µg/m3 na zona residencial del Lloredal, un valor disparáu que da idega de la gravedá de la situación de contaminación del aire. Pa les partícules Pm10 la OMS encamienta unos valores llende pa partícules de 15 µg/m3 de media, asina que se sobrepasó’l másimu en 500.
Tamién se algamaron estos díes valores elevaos de bencenu, aportando a valores de 20 µg/m3, cuando la OMS recomienda nivel cero y España almite un másimu de 5µg/m3.
Esta contaminación qu’alienden los vecinos de la área supón una clara afección pa les persones con enfermedaes respiratories o cardiovasculares.
Poro, la Coordinadore ecoloxista reclama al Principáu d’Asturies y al Conceyu de Xixón qu’active darréu ensin falta el protocolu de contaminación del aire na área de Xixón nel so nivel preventivu, al llevar dellos díes siguíos l’aire nun estáu desfavorable y nun prevése precipitaciones dica’l sábadu.
Redaición InfoAsturies
This work is licensed under a Creative Commons Attribution 4.0 International License.
