L’avance del proyeutu depende la l’aprebación del mesmu por parte de la direición a nivel européu de la empresa, que desixe un alcuerdu previu cola plantiya anantes de soltar los cacarexaos mil millones d’euros, de los qu’a la hora la verdá cuenten que la metá seyan d’inversión público.

Sicasí, la negociación de la plantiya ta aparao pola falta d’alcuerdu, que pidi a los trabayaores que roblen un pautu de rellaciones llaborales contrariu a los sos intereses y qu’aceuten un axuste de personal que roza los mil emplegos, alrodiu’l venti por cientu del total. Los sindicatos pel so llau desixen la non perda de poder alquisitivu pa los trabayaores, alegando los descomanaos beneficios de la multinacional nel caberu añu, a lo que la empresa retruca falando de “moderación salarial”.

Los Gobiernos d’Asturies y España, entantu, caltiénense al marxe pesi a los miles de millones d’aides públiques inverties nesta internacional. Nesi sen, el Congresu los Diputaos vien de refugar la propuesta presentá el mes pasáu por Andecha Astur a traviés del voceru d’EH – Agora Repúbliques . Nella entrugábase pola proteición por parte del gobiernu de los trabayaores d’ArcelorMittal y  apurríense unes propuestes pa caltener  l’emplegu y los drechos llaborales nesta empresa, defendiendo la prioridá de los intereses públicos.

Nuria Prendes