Con Astur Cola Asturies entra nel tarrén de los refrescos gasificaos, dando una oportunidá más a la campaña #ConsumiAsturiano, pol consumu de productos del país

El Molín del Nora, empresa allugada’n Noreña, fundóse nel 1998, dedicando la so actividá a la ellaboración de bébores, mayormente alcoóliques, incluyendo una bayurosa gama d’oruxos, cremes, auguardientes y llicores. Va pocu vien de presentar el so nuevu productu, Astur Cola, un refrescu de cola de formulación artesanal a base de nuez de cola y cafeína d’orixe natural, que se presenta en dos variedaes, con stevia y con zucre, la primer d’elles con cero caloríes.

Nun entamu va comercializase namás n’Asturies, onde yá se distribuyeron 14.000 botelles dende qu’entamó la so fabricación el mes pasáu. De momentu namás pue alcontrase en chigre y tiendes, asina comu nos supermercaos de La Cooperativa, pero esperen poder ampliar la so llinia de distribución.

Con ello dásenos a los asturianos una oportunidá más pa consumir productos d’ellaboración propia, sofitando con ello a les empreses y la economía del país, una llabor que ye de toos y toes y que pue dar muncho puxu a Asturies.

This work is licensed under a Creative Commons Attribution 4.0 International License.