• Portada
  • >
  • Asturies
  • >
  • Xose Lluis García Arias: “Nun se llogró la oficialidá porque nun se trabayó por ella. Amás, a Barbón diéron-y un toque dende fuera”

Xose Lluis García Arias: “Nun se llogró la oficialidá porque nun se trabayó por ella. Amás, a Barbón diéron-y un toque dende fuera”

  • 7 Mayu, 2022

ENTREVISTA A XOSÉ LLUIS GARCÍA ARIAS (4ª entrega de cincu)

Falamos col espresidente de les responsabilidaes nel fiascu de la Oficialidá non aprobada y del tratu que’l Gobiernu d’Asturies da a la llingua

 

¿Abultó-y sincera la posición del presidente Barbón nesti caberu intentu de reforma estatutaria y nes negociaciones sobro una posible oficialidá?

Yo a Barbón nun lu traté presonalmente nunca. Por embargu, yo barrunto que con Barbón podría entendeme, seguramente, d’haber coincidío nel tiempu, claro. Podría entendeme nel sen de poder falar d’autonomía, de poder falar del pesu d’Asturies nel Estáu, de poder falar de la presencia l’asturianu nes istituciones, etc. Eso nun foi posible por motivos temporales.

Agora, si digo la verdá, yo nun entiendo la posición de Barbón nesti intentu de reforma del Estatutu d’Autonomía. Nun lu entiendo. Sólamente pueo camentar que primero llanzóse a falar de la oficialidá creyendo que tenía fuercies suficientes. Yo sí pienso que tenía fuercies abondes, nun sé cómu tenía de negociar, pero pa eso ye él el políticu, nun soi yo. Había que negociar, a lo meyor non lo que pidía la última fuercia que se sumó, pero a lo meyor había coses que negociar.

Y, dende llueu, lo que sí creyo firmemente ye que Barbón recibió un toque dende fuera. Porque fuera, comu nun s’enteren de ná, namái qu’agora nos caberos momentos, debieron ver que taben alzaos los seutores más radicales de la drecha de siempres, de mou que fasta la tía Nemesia sedría una benévola benefactora del idioma. Y fuera nun cuntaben cola reaición que la drecha entamaba tener. Y entós nun supieron reacionar. Pensaben que diba ser una custión meramente coyuntural y que diben salir d’ella ensin da-y muncha importancia. El casu demuestra que teníen poca información sobro’n qué sociedá viven y que tienen ehí compañeros que son d’otra galasia.

Eso per un llau. Y per otru llau, el PSOE carauterízase por tener dos almes, dicen eso los enteraos nel PSOE. Equí vimos dalgunos conseyeros falando d’una manera realmente llamativa, non porque ellos seyan llamativos, sinón porque esperábase d’ellos un poco más de respetu a les istituciones, comu siempres pidieron ellos mesmos, del mesmu mou que siempres dixeron que’l partíu nun debía tener posiciones contraries.

Yo creo que too esto sí qu’intervino na llamá d’atención que debió recibir Barbón, creyo yo.

En tou casu, a mí lo que llama l’atención ye la falta de rempuesta de los que taben sofitando esti procesu que capitaneaba Barbón. ¿Qué pasó? Barbón paró máquines y callaron toos, toos, toos… ¿Ónde tán? ¿Ónde tán los otros que teníen de falar y nun falaron?

 

¿Qué tratu-y paez a usté que se ta dando anguañu, dende’l Gobiernu asturianu, a la llingua’l país?

La idega fundamental ye ésta: nun se llogró la oficialidá probatiblemente porque nun se trabayó por ella. Vamos, de xuru que porque nun se trabayó por ella. Porque pa otres custiones qu’interesen muncho sí se preparen mui bien les actuaciones, sí se distribúin los papeles de quién tien qu’actuar públicamente d’una manera y quién d’otra… Y eso yo nun lo vi nesta ocasión.  Por consiguiente, nun se preparó lo que yera la gran ocasión: la discusión pública.

Agora bien, nun hai dulda de que, mesmamente ensin tener llográ la oficialidá, el Gobiernu pue facer montones de coses que nun fai, non sólo que nun fai sinón que fai mal, o que nun dependiendo d’él dexa faceles mal. Y ello porque nun tien quien lu aconseye pa facer les coses bien, o porque nun se-y ocurrió, o porque los muérganos del Gobiernu tán durmiendo.

Un exemplu. Ye’l casu la TPA. La televisión asturiana tien coses de xente que sabe falar asturianu, que ta ehí y qu’a vegaes failo mui bien. Mentatu, per otru llau, tien una serie programes que se carautericen pola bastedá y por falar asturiano amestao malo a conciencia, pero nun ye falar amestao porque nun se sepa otra cosa, sinón porque nun se quier facer d’otramiente. ¿Eso nun se pue correxir? ¡Pue correxise totalmente!. Lo que nun pue facese ye convertir en llingua modélica lo que son manifestaciones llinguístiques diglósiques.

¿Nun se pue correxir la toponimia? Qu’unes vegaes sal a dreches y otres sal al revés. ¡Claro que se pue facer!

¿Nun se pue facer que la reciella tenga na tele dalgún programa? Pero non solamente de caxigalines, sinón de coses que puen tener más interés. ¡Claro que se pue facer!

Agora si queremos que l’asturianu s’asocie a cachondéu, a folixa y caxigalines, entós sigamos asina. Pero nin con oficialidá nin ensin oficialidá se llogra denguna llingua d’esti mou.

Pero, mesmamente ensin oficialidá, pue correxise eso darréu y veríamos comu la situación camudaba.

Lo qu’hai que dicir al Gobiernu ye: pongan ustedes ehí a xente a trabayar en serio y verán cómu les coses van bien. Y pongan estímulos esternos. Y d’eso sí se-yos podía facer una llista, de xente qu’hai n’Asturies y que lo pue facer mui bien.

Nesta situación de desatención del idioma hai intencionalidá. Nun sé de quién ye la intencionalidá; nun pueo dicir que seya del presidente’l Gobiernu, que nun sé si entra neses coses, nin si dio una orde que nun-y faen casu. A vegaes, y dígolo polo que pasa na TPA, pue tener muncha más influyencia cualquier otra autoridá de segundu rangu.

En resume, lo ideal y a lo que nun podemos renunciar enxamás, ye’l llogru la oficialidá. El que la llingua asturiana seya tan llingua n’Asturies comu’l gallegu en Galicia o’l catalán en Catalunya. Ési ye’l puntu: que nun podemos ser menos.

Pero dicho eso, tamién ye verdá qu’hai xeres comu la recuperanza total del idioma nel que se puen dir dando pasos yá, tengamos oficialidá o nun la tengamos entovía. Y eso basta planealo y querer facelo. Ver cómu tien que tar la llingua nos medios de comunicación, na enseñancia, na toponimia, etc.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies