Seique se desconoz el númberu esautu, según los guardes que les presentaron son abondes les denuncies esistentes por infraciones de caza, pesca y usu d’espacios naturales feches polos axentes a lo llargo l’añu 2021 que desapaecieron, ello ye, que nun tan pendientes de tramitar pero que defechu nun fueron  tramitaes pol Serviciu de Guardería del Mediu Natural de la Conseyería de Mediu Rural, siendo ello qu’asgaya tarán ya prescrites

La Coordinadora Ecoloxista d’Asturies, enterada polos guardes de l’altu númberu de denuncies ambientales desapaecies vien de solicitar información a la Conseyería de Mediu Rural, cola fin de conocer el algame de los espedientes de denuncies desaparecios, asina comu l’apertura d’una investigación interna dientro la Conseyería, y más concretamente dientro’l Serviciu de Guardería del Mediu Natural, pa determinar y depurar les responsabilidaes que correspuendan ante la presunta desapaición de denuncies feches polos Guardies del Mediu Natural a lo llargo l’añu 2021.

“Esti fechu ye una amuesa más que se vien a sumar al escenariu global de dexadez, desidia y negligencia de la Conseyería de Mediu Rural no que cinca a la xixilancia y proteición del mediu natural asturianu de los caberos años” declaren dende la CEA. Destaquen amás l’estáu d’abandonu y precariedá na que s’alcuentren los axentes ambientales encargaos de xigilar y velar por dicha proteición: Desasistencia xurídica ante menacies y agresiones carecies, vehículos que son una llaceria, falta de medios y material de trabayu, desorganización alministrativa, escasez de plantilla, places ensin cubrir…