La dixitalización estrema de l’alministración fae que l’ataque informáticu al conceyu Xixón paralice defechu’l trabayu municipal

El martes 19 a la una la nueche deteutóse un hackeu na web del Conceyu Xixón. Tres díes dempués tola cadarma municipal sigue inoperativo. Nun se pueden realizar xestiones, pidir cites, realizar pagos nin presentar xustificaciones. Nun se puede recargar la tarxeta del bus. El conceyu nun pue garantizar que la información personal nun te agora a dimposición de los pirates. Ta nidio que nun se pue teletrabayar.  Los plazos alministrativos tan paralizaos, por agora namás los de Xixón: si se precisa un certificáu emitíu en Xixón pa, pongamos, solicitar una beca, nun se va poder presentar ya’l plazu avanzará, a nun ser que s’algame un alcuerdu con rapidez pa frenar los plazos, daqué previsto na llei pero que’l plenu tien de xestionar… si tien comu. Nun furrulen los caxeros ciudadanos. Nun furrula siquiera’l mail.

El plenu municipal tuvo de posponese: la “democracia” precisa de soporte teunolóxicu.

La panacea d’informatizar tou nun lo yera tantu, l’escesu de dependencia dixital tien estos problemes y entantu los responsables municipales coinciden en falar d’invertir millones en ciber seguridá. Naide se plantega repersonalizar la xestión del conceyu, colo que la puerta a estos ataques nun va quedar presllá, namás va entornase.

Que tomen nota revolucionarios varios: pa baltar el sistema ya nun furrulen les barricaes, son más efeutivos los ciberataques.