La llista ‘100 Xóvenes Talentos de la Gastronomía’ del Basque Culinary Center, un importante proyeutu de formación, investigación y anovación destináu al desendolcu del sector gastronómicu a nivel mundial inclui pente los cien nominaos a tres asturianos de futuru, reconociendo les nueves figures profesionales cabezaleros na gastronomía del país nos prósimos años y el pesu del quesu na gastronomía asturiana.

Una d’ellos, Elena Soberón Pidal, de 28 años, ya fore premiada n’avientu pol Congresu Européu de Mocedá Llabradora del Parlamentu Européu, por mor de la recuperación del quesu d’Aranga, llocalidá onde vive y onde fundó, con namás  21 años, una quesería de quesu Cabrales, que lleva’l so apellíu y xestiona cola so hermana Ana. Amás,  tienen una ganadería con cerca de 30 vaques y ye vicepresidenta de la DOP Quesu Cabrales.

Jose Luis Alonso ye tamién queseru y pastor, el productor de Gamonéu del Puertu más mozu de Picos, con 27 años. El so quesu recibió ya dellos galardones, pesi a la so curtia trayeutoria. Curia personalmente a los animales que-y dan el llechi y fae el so quesu (quesería Uberdón)con un procesu artesanal afincáu na tradición.

El tercer galardonáu, Tony Stiopu,  de 25 años lleva cincu trabayando comu xefe de partida en Casa Marcial, lo que quier dicir que ye’l cocineru responsable de les carnes y pexes. La caltenibilidá, los proyeutos de Km cero y l’autoabastecimientu son les sos inquietudes y porgüeyos.

Pente los tres debuxen el que tien de ser el futuru de la gastronomía n’Asturies, produción artesanal de calidá que de vida a los pueblos y hostelería comprometía colo propio.