L’incrementu del 6’4% de les fuercies de seguridá, con 2.045 guardies civiles y 1.492 policíes nacionales n’Asturies, nun tuvo dalu efeutu positivu na proteción de les muyeres nes cais
Les violaciones medraron un 85% respeutu al 2020 ya un 208% dende’l 2019, siendo na so cuasi totalidá cometies contra muyeres. En total foron 266 los delitos contra la llibertá ya indemnidá sesual denunciaos n’Asturies a lo llargo’l 2021, de los que 37 correspuenden a agresiones sesuales con penetración. Albídrase que’l 80% de les agresiones sesuales nun son denunciaes.
Esmolez especialmente l’aumentu de la violencia pente xente mui mozo, dándose casos d’agresores de 14 o 15 años, asina comu’l fechu de qu’espoxigó’l porcentaxe de les agresiones cometies por xente conocío, especialmente amistaes, entantu baxaron les perpetraes por desconocios.
Les autoridaes despliquen esti xorrecimientu de les cifres cola mayor concenciación y poro, mayor porcentaxe de fechos denunciaos. Sicasí, comu apunten dende los coleutivos nos que s’atiende a les víctimes “si hai denuncies, ye por qu’hai violencia”.
El 016 ye’l teléfonu de baldre qu’atiende a les víctimes de violencies contra les muyeres, disponible en 53 llingües estremaes, munches ensin falantes n’Asturies, pero non n’asturianu. Tamién s’ufre información al traviés del correu llectrónicu 016-online@igualdad.gob.es y asesoramientu y atención sicosocial nel Whatsapp 600 000 016. Nel casu los menores tienen a la so dimposición el teléfonu d’ANAR 900 20 20 10.
This work is licensed under a Creative Commons Attribution 4.0 International License.
