El teléfonu d’atención ante la violencia de xéneru, doméstica, sesual, mutilación xenital, matrimoniu forzosu, acosu llaboral y trata con fines d’esplotación sesual atenderá’n 53 llingües, munches d’elles ensin falantes n’Asturies, pero nun reconoz l’asturianu, dexando a les asturianes nuna situación d’indefensión inaceutable

El diputáu Jon Iñarritu, del grupu EH Bildu y de la coallición Agora Repúbliques, na que ta ensiertá Andecha Astur con otros grupos nacionaliegos del estáu, presentó una entruga per escritu a la Ministra española d’Igualdá, Irene Montero (Podemos), na que plantega la vulneración de los drechos de les muyeres maltrataes d’Asturies, al dificultáse-yos la proteición al traviés del teléfonu 016.

La situación non solo implica un dañu a la dinidá y drechos de les asturfalantes, que vendrá a agravar los daños ya causaos pol maltratu que traten de denunciar, sinón que pue xenerar casos d’incomprensión y denegación d’ausiliu, comu ya hai recoyíos n’hospitales públicos nos que los profesionales nun son quien a pescanciar a la persona qu’acude a ellos, con resultaos n’ocasiones  fatales.

Con esta entruga, que’l gobiernu d’España tendrá de retrucar por escrito, Andecha Astur denuncia un pasu más na  represión llingüística que carez Asturies, protagonizáu nesti casu por un gobiernu teóricamente favoratible a la oficialidá, comu ye Podemos.

“Nun se trata yá d’una mera represión llingüística, contraria a tola llexisllación internacional y estatal que reconoz el drechu a la non discriminación por mor del idioma. Trátase de qu’amás esta actitú escluyente, castiga específicamente a les asturianes, lo cualo aseméyase demasiao a un delitu d’odiu. Y pue condicionar los drechos a la vida, a la llibertá sexual, a un trabayu dinu”