• Portada
  • >
  • Sociedá/Llaboral
  • >
  • Namás el 10,02 % de les persones que viven n’Asturies perbaxo la llende la probitú ye beneficiaria del IMV

Namás el 10,02 % de les persones que viven n’Asturies perbaxo la llende la probitú ye beneficiaria del IMV

  • 22 Febreru, 2022

L’Asociación de Direutores y Xerentes de Servicios Sociales desvela que’l Ministeriu Español d’Inclusión Social nun executó mil millones del presupuestu pal Ingresu Mínimu l’añu pasáu

De magar la so creación l’IMV algamó namás al 35,8% de les persones anicialmente previstes. Entantu, esta renta básica estatal va sustituyendo les rentes mínimes de ca territoriu, nel casu d’Asturies al Salariu Social Básicu, que van desaniciándose y perdiendo presupuestu. Sicasí, el 48% de los beneficiarios del SSB mesmu siguen dependiendo de la ayuda asturiana, siendo ello que mientres n’España l’IMV cubre al 111% de la población que percibía rentes autonómiques, incrementándose’l númberu de persones atendíes nun 11%, n’Asturies l’IMV namás algama al 52% de los qu’anantes cobraben el SSB.

9.320 families acedieron l’añu pasáu al IMV,  dando cobertoria a más de 20.000 persones, 12.710 adultos y  7.361 menores, entantu otros 30.000 queden fuera d’esta proteición por negaseyos l’acesu a esta renta mínima. En proporción a la población baxo la llende de la probitú, esti “colchón social” algama namás al 10’02% de los asturianos en situación d’esclusión social.

Entantu, la burocracia, los desixentes requisitos y el so venceyu a los salarios percibios n’exercicios anteriores faen que se denieguen 3 de ca 4 solicitues, siendo ello que l’añu pasáu,  en plena crisis social poles consecuencies del coronavirus, el ministeriu nun executó un terciu del presupuestu destináu a aselar el carecimientu de les families más vulnerables, pero preslló l’añu retirando’l drechu cara al 2022 a cientos de families por “percibir dalgún ingresu d’orixe llaboral nel 2020”

Acordies los datos de la Seguridá Social facilitaos a traviés del Portal de Tresparencia, la cuantía media percibía ye de 194€ por persona, 437 por llar, quedando nidio que l’Ingresu ye, efeutivamente, Mínimu, pero dificilmente Vital. 

 

Llucía F. Marqués


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies