Los Riders manifiéstense esta tardi en Xixón polos sos drechos llaborales. CSI Riders, alvierte del riesgu de que s’esparda pente otres profesiones el sistema Rider y llamen a participar al conxuntu de la población

La Comisión Europea aprebó la selmana pasá una direutiva qu’obliga a les compañíes a incorporar a los sos repartidores como trabayaores fixos. Seique esa direutiva entá ta por ser d’obligada aplicación, ya va cuatro meses que midies asemeyaes se recoyíen na Llei Rider, aprebada pol gobiernu español y fasta agora papel moyao. La so principal consecuencia ye l’abandonu de la empresa de repartos Deliveroo, que consideró que si nun se yos permitía la llibre esplotación de los trabayaores el negociu nun yera rentable, pero entá nun xeneró meyores na vida de los emplegaos.  “Anguañu la llei Rider ta tan lloñe de cumplise comu los convenios o’l propiu Estatutu de los Trabayaores” denuncien dende’l sindicatu.

Les condiciones llaborales del seutor, lloñe de meyorar apioren progresivamente, forciando a trabayar fasta trece hores diaries siete díes a la selmana pa conseguir pocu más de 600 euros llimpios, depués de pagar autónomos, gasolina, seguros y otros gastos asociaos al desendolcu del so llabor, que tendríen de dir a cargu de la empresa. La idega de vacaciones, descansos, aforru o siquier ingresu regular tórnense inalgamables pa esti seutor.