Los estrozos prevocaos pol pasáu temporal nos Conceyos d’Onís, Ponga y Cangues impliquen cerca de tres millones d’euros en reparaciones

El Conceyu d’Onís xúnese a los de Ponga y Cangues d’Onís na solicitú de declaración de zona catastrófica. Pendientes entá de finar les estimaciones de costes pa unviales a Delegación de Gobiernu, en Cangues cifren en más de 1’5 millones d’euros el coste de reparar  los estrozos, especialmente los causaos nes carreteres polos argayos, pero non solo.

Onís calcula daños por valor de cuasi 900.000 euros y Ponga, un de los conceyos más afeutaos, entá nun fexo públicos los sos cálculos, pero namás nel alquiler de maquinaria pa entamar a trabayar na reparación de los argayos ya gastaren 20.000 euros.

Les altes cifres son inasumibles pa estos conceyos, escediendo la capacidá económica que tienen p’afrontar esta triba d’obres, polo que presenten la solicitú a ser reconocios como zones catastrófiques pa poder optar a aides económiques pa la reparación de les sos vies.