• Portada
  • >
  • Cultura
  • >
  • Charres sobro’l procesamientu de Rodolfo Martín Villa

Charres sobro’l procesamientu de Rodolfo Martín Villa

  • 14 Avientu, 2021

La Comuna d’Asturies y FAMYR convoquen trés actos esta selmana sobro’l procesamientu de Rodolfo Martín Villa pola xueza María Servini de Cubría, del Xulgáu Nacional Criminal y Correccional Federal 1 de Bonos Aires

El xulgáu arxentín dictó un estensu autu con fecha 15 d’ochobre de 2021, nel qu’alcuerda procesar a Martín Villa por cuatro homicidios agravaos -asesinatos-, nun contestu de crímenes contra la humanidá y sigue la investigación de los otros ocho polos que ta imputáu.

Pa falar de too ello vamos cuntar con Josu Ibargutxi, prisioneru del franquismu dende 1968 a 1977, querellante na Querella Arxentina contra los crímenes del franquismu que viaxó a Bonos Aires pa declarar énte la xueza Servini y que va falar del procesamientu de Martín Villa por crímenes de llesa humanidá nesta causa.

Les cites pa sentir a Josu Ibargutxi son trés, el miércoles 15 a les 19 hores n’Avilés, Palaciu de Valdecarzana, en compañía de Jesús Gómez, de FAMYR y de Rodríguez Amorín, de La Comuna d’Asturies. El 16 a la mesma hora, nel Edificiu de la Escuela de Comerciu de Xixón, de la man de Luis Pascual, miembru del Atenéu Obreru y Carme Prau, de La Comuna d’Asturies. La última intervención va ser nel Cibercentru de La Lila n’Uviéu, el vienres 17 a les 19 hores y nesta ocasión acompañaralu Tino Burgos, en representación de La Comuna d’Asturies.

Rodolfo Martín Villa, conocíu pol nomatu popular de “La cachaporra de la transición” pola so particular dureza represiva, tuvo so los sos ordes al Comisariu Conesa y a otros torturadores de la Brigada Política Social franquista, a quien non yá caltuvo operativos sinón que los condecoró, como ye’l casu de Billy el Neñu.

Foi Secretariu del Sindicatu vertical y miembru del Conseyu del Reinu, qu’asesoraba a Franco en diverses materies y dempués de la “transición” Gobernador Civil de Barcelona, Ministru de Relaciones Sindicales, de Gobernación, d’interior y Vicepresidente d’España, autor del llibru “Al serviciu del Estáu”, siendo unu de los artífices principales de la política represiva contra’l movimientu obreru y social que reclamaba drechos y llibertaes nos primeros años de la “Transición”. Naquel tiempu, n’Avilés, un trabayador de Ensidesa recibió pel costazu, un disparu de la policía cuando taba faciendo una pintada.

Anguañu, como preba de la continuidá y vixencia del franquismu n’España, ye presidente del Sareb y nomáu nel 2013 miembru de númberu na Real Academia de Ciencies Morales y Polítiques, cofundador de la Fundación de la Transición Española, vocal de FADES y miembru del Patronatu de la Universidá Pontifica de Salamanca, condecoráu recién por Felipe VI nel Congresu los Diputaos pol 40º aniversariu de les primeres elecciones tres la dictadura.

N’España, la llei d’Amnistía de 1977 garantiza la impunidá a tolos responsables de la represión, polo qu’hasta’l momentu consiguióse namás que seya imputáu nos tribunales d’Arxentina, por crímenes contra la Humanidá.

 

Redaición InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies