Les primeres presentaciones del primer llibru de la editorial La Semeya, del escritor Xosé I. Pidal tan programes en Noreña, Uviéu y Xixón

La selmana pasada La Semeya recibía los exemplares de la edición de “La vida esplicada”, la primer novela del escritor Xosé I. Pidal Montes y el primer llibru qu’edita la editorial noreñesa. L’autor fexo la recepción oficial de la obra y ésta ya s’alcuentra na distribuidora pa que llegue a toles llibreríes asturianes y que cualquier persona pueda mercala o encargala nelles. Pidal Montes (Bimenes, 1970). Tien espublizaos trés poemarios “Nadie se Salva”  (Versos & Reversos), “Ensin bones referencies” (Suburbia) y “Parabellum en flor” (Best Books). Con “La vida esplicada” debuta nel xéneru de la narrativa, una obra rompedora na que’l so argumentu ye la propia novela. Ye’l so segundu títulu n’asturianu después d’“Ensin Bones referencies”.

La vida nun tien argumentu, y ante esa incontestable verdá, l’autor adiéntrase nel territoriu de la narrativa a traviés del invisible filu conductor de lo oyío, de lo lleío, de lo vivió; de l’acordanza de tantos nomes qu’hasta la memoria escaeció. Siempre buscando que quien llea esta vida esplicada caleye pela sienda que s’abre ente la niebla de la lleenda y la realidá.

Presentaciones del llibru

Yá se conocen dalgunes feches y llugares onde Pidal Montes “esplicará la vida”. La xira empieza en Noreña, con una presentación oficial en La Semeya el xueves día 2 a les 19:30 hores. Uviéu va ser la segunda parada, el vienres 3, preséntase nel nuevu espaciu que Pintar-Pintar abrió na plaza Juan XIII. La siguiente fecha zarrada ye en Xixón, na llibrería La Buena Letra, el miércoles 15 a les 19:30 hores. Habrá bastantes presentaciones más, con Carbayín y Bimenes como parada obligatoria, que se tan zarrando.

Redaición InfoAsturies

This work is licensed under a Creative Commons Attribution 4.0 International License.