• Portada
  • >
  • Asturies
  • >
  • Les inundaciones pudieron prevese y los sos daños, evitase

Les inundaciones pudieron prevese y los sos daños, evitase

  • 25 Payares, 2021

Nos cuasi trés años que pasaron dende les anteriores grandes inundaciones nun se punxeron en marcha los programes que podíen evitar que se repitieren los daños

2019. Andecha Astur presenta nel senáu, al traviés de Jon Iñarritu (EhBildu) y Agora Repúbliques 10 cuestiones sobro’l mal estáu de los calces fluviales, rede ferroviaria y carreteres, que favorecieron los importantes daños xeneraos poles lluvies en xineru del 2019, ente les que destacó’l desallugu del hospital Francisco Grande Covián, en Les Arriondes, pal que proponen soluciones, recordando’l plan de prevención d’hinchentes paralizáu nel 2015. Pídense responsabilidaes, pero sobremanera, la inmediata puesta en marcha d’un rexistru de zones anubribles y de les correspondientes midíes pa evitar que se repitan los fechos.  Naide respuende.

2021. El 112 Asturies recibe en cinco hores más d’un centenar d’alertes rellacionaes coles agües. En concretu, hasta les seis de la tardi d’ayeri, rexistró 53 cortes de carreteres, 34 inundaciones de la rede viaria, 20 desbordamientos y 8 emerxencies por ríos desbordables.  La Conseyería de Salú volvió a vese obligáu a desallugar l’Hospital de Les Arriondes y ADIF comunicó al 112 que caltien suspendíu’l tráficu ferroviariu ente los conceyos de Piloña y Llanes. Tamién en Llanes, la rotura  na conducción del suministru d’agua de la mayor parte del conceyu, conocida como ‘macrotraída’, amenaza con dexar paradóxicamente ensin agua a la población. Debiéron desallugase tamién dos colexos públicos.

Toles emerxencies yeren previsibles y prevenibles col plan d’identificación de zones de riesgu d’inundaciones que tuvo de ponese en marcha hai a lo menos trés años -el primer desallugu del Grande Covián data del 2010, fai casi 12 años- . Barbón llamenta que “nun llegaren a tiempu les obres del plan contra les inundaciones” y refiriéndose al citáu hospital “Espera que les obres seyan axudicaes nunos meses”. Crucemos los deos por que nun vuelva llover mentantu.

Adrián miente amás al declarar que los tarrenes nos que se costruyó l’hospital nun yeren inundables cuando esti foi llevantáu “y agora si lo ye”, achacando al cambéu climáticu’l problema. En realidá cuando foi inauguráu oficialmente nel 1998 yá hubo alderique sobro la conveniencia del so allugamientu, nel barriu Castañera, en plena vega del ríu Piloña. El tarrén yá apaecía catalogáu comu inundable na cartografía del entós Ministeriu español del Mediu ambiente, siendo calificada la zona con indiz de riesgu nivel 3, siendo 4 el máximu, por un estudiu del Institutu de Recursos Naturales y Ordenación del Territoriu (Indurot), de la Universidá d’Uviéu. L’hospital foi igualmente costruyíu nesos tarrenes, dempués d’un turbiu movimientu de millones, calificaciones y permisos nos que tuvo implicáu l’entós Presidente Pedro de Silva (PSOE) y Juan Luis Rodríguez-Vigil (PSOE) comp Conseyeru de Sanidá.

Pero tranquilos, que SuperBarbón yá tomó midíes, escribió un tuiter “De camín a Asturies énte la gravedá de la situación, adelantrando’l mio regresu (…) ye preferible ser precavíos”. Tamos salvaos.

 

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies